Ezai 54 - Labib An Kreol Seselwa

Lanmour Senyer pour Izrael

¹ Sante, fanm steril! Ou ki pa'n zanmen ganny zanfan, Kriye e fer tande sanson lazwa! Ou ki pa'n konn douler lakousman. Sa fanm abandonnen pou annan plis zanfan, ki fanm marye. La sa ki SENYER i deklare:

² Agrandi lespas ou latant, fer rido ou lakaz pli larz; pa ezite pour ou fer li; redi byen bann lakord ou latant; anter byen son bann pike!

³ Annefe, ou pou grandi dan tou direksyon: Adrwat, agos e ou bann desandan pou pran posesyon teritwar bann nasyon vwazen e zot ava peple bann lavil abandonnen.

⁴ Pa per, akoz personn pa pou fer ou onte. Pa dekouraze, akoz ou pa pou ganny imilye. Ou pa pou rapel laont dan letan ou zenes; ou pou nepli mazin dezoner letan ou ti vev,

⁵ akoz ou mari, li menm ou Kreater; son non i SENYER liniver. Sa enn ki Sen dan Izrael, li menm ki ou Sover, i apel Bondye later antye.

⁶ SENYER in apel ou ankor; parey en fanm ki son mari in abandonn li, ki dan traka, parey en fanm ki son mari, lanmoure son lazenes in rezete, ou Bondye i dir:

⁷ Mon'n abandonn ou pour en moman, me dan mon konpasyon, mon pou rasanble ou.

⁸ La sa ki SENYER ou Sover i deklare: Dan mon gran lakoler, mon ti'n maske mon figir avek ou. Me mon pou touzour kontan ou e annan konpasyon anver ou.

⁹ Pour mwan, sa i fer rapel letan Noe: Parey mon ti'n promet dan sa letan ki delo pa pou kouver later, mon promet ki mon pa pou zanmen met mwan ankoler kont ou e ki zanmen mon pou menas ou.

¹⁰ SENYER ki annan konpasyon pour ou, i deklare: Menm si bann montanny i kapab tonbe; bann kolin i kapab sanz plas, mon lanmour anver ou pa pou zanmen bouze, e lalyans lape ki mon'n fer avek ou pou reste ferm.

Zerizalenm dan Lavenir

¹¹ Zerizalenm! Ou ki malere! Ou ki tanpet in sekwe e ki pa'n ganny okenn konsolasyon! Mon pe al ranplas ou fondasyon avek marb, e refer ou fondasyon avek pyer presyez.

¹² Latet ou miray pou kouver avek ribi; ou bann laport avek pyer briyan e tou ou bann miray kouver avek bann pyer presyez.

¹³ SENYER ki pou edik tou ou bann zanfan, e zot pou viv dan lape.

¹⁴ Ou ava ganny gide par lazistis; personn pa pou kraz ou, akoz ou pou nepli per; personn pa pou teroriz ou, akoz lafreyer pa pou apros ou.

¹⁵ Si ou ganny atake, sa pa pou sorti kot mwan; sa enn ki pou oule fer konplo kont ou ki pou tonbe akoz ou.

¹⁶ Gete! Mwan ki'n kree forzron ki soufle lo labrez sarbon, ki fabrik bann zarm pour son litilite. Mon'n osi kree sa dimoun ki kapab detri sa bann zarm.

¹⁷ Tou zarm ki'n ganny fabrike kont ou pa pou servi nanryen. Okenn lakizasyon kont ou pa pou tenir debout. Sanmenm par ki ou'n rezerve pour bann serviter SENYER e drwa ki sorti kot mwan. SENYER ki'n deklare.