Ezai 52 - Labib An Kreol Seselwa

Bondye Pou Sov Zerizalenm

¹ Siyon leve! Leve! Repran kouraz. Zerizalenm! Lavil sen! Met ou bann zoli lenz. Personn ki pa'n ganny sirkonsi oubyen enpir, pa pou antre kot ou ankor.

² Zerizalenm! Leve, sorti dan lapousyer. Repran ou plas! Fiy Siyon! Detas sa lasenn kaptivite dan ou likou!

³ La sa ki SENYER i deklare: Ou ti ganny vann pour nanryen, e ou pou ganny aste san larzan.

⁴ La sa ki SENYER i deklare: Otrefwa, mon pep ti desann Lezip kot i ti reste koman en etranze; bann Asiriyen ti osi martiriz li pour nanryen.

⁵ Ki mon pe fer la, SENYER i deklare, ler mon war mon pep pe ganny anmennen san rezon? Son bann sef pe kriye, SENYER i deklare e mon non i ganny ensilte tou lazournen.

⁶ Pour sa rezon ki mon pep pou konnen lekel mwan; pour sa rezon, sa zour la, i pou konnen ki mwan ki pe koze: La mon pe vini!

⁷ Gete koman i zoli lo montanny, lipye sa mesaze ki anons lape, ki anmenn bon nouvel, ki proklanm delivrans, ki dir avek Siyon: Ou Bondye i lerwa!

⁸ Ekoute! Ou bann santinel i lev lavwa; ansanm, zot sant bann sanson lazwa, akoz avek zot prop lizye, zot war SENYER ki pe retourn Siyon.

⁹ Bann debri Zerizalenm! Ansanm, sant avek lazwa, akoz SENYER in konsol son pep, in sov Zerizalenm!

¹⁰ SENYER in montre lafors son lebra devan tou bann nasyon; e later antye pou war ki mannyer nou Bondye i sov son pep.

¹¹ Ale! Ale! Sorti kot zot ete! Pa tous nanryen ki enpir. Sorti parmi zot! Zot ki pe anmenn bann lobze sakre dan servis SENYER! Pirifye zot!

¹² Sa fwa si, ou pa pou sorti an presan; ou pa pou al an tayan; akoz SENYER pou mars devan ou e Bondye Izrael ava protez ou par deryer.

Serviter dan Lasoufrans

¹³ Mon serviter pou prospere; i pou ganny egzalte, i pou monte e ganny gran loner.

¹⁴ I ti telman defigire, ki bokou ti etonnen ler zot ti war li. I ti nepli resanble en imen.

¹⁵ Bokou nasyon pou reste etonnen; bann lerwa pou ferm zot labous devan li akoz zot pou war sa ki pa ti'n anonse, zot ava konpran sa ki zot pa ti'n zanmen tande.