Ezai 49 - Labib An Kreol Seselwa

Izrael en Lalimyer Bann Nasyon

¹ Zabitan bann zil! Ekout mwan. Bann pep ki reste lwen! Port atansyon. SENYER in apel mwan avan ki mon ti ne; in apel mwan depi dan vant mon manman.

² In fer mon labous parey en lepe ki byen fite; in kasyet mwan dan lonbraz son lanmen; in fer mwan vin parey en dart byen pwenti; in protez mwan dan son sak fles.

³ In dir mwan: Izrael! Ou menm mon serviter. Par ou, mon pou montre mon laglwar.

⁴ Me mon ti pe dir: Mon'n travay dir pour nanryen. Mon'n depans mon lafors pour bann keksoz initil. Pourtan, mon ti konnen ki SENYER ki pran ka pour mwan e ki mon rekonpans i avek Bondye.

⁵ Aprezan, SENYER i dir ki i'n form mwan dan vant mon manman pour mwan vin son serviter e fer Zakob retourn kot li e pour rasanble Izrael otour li. SENYER in glorifye mwan devan li akoz mon Bondye ki ti mon lafors.

⁶ I ti deklare: Mon'n swazir ou koman mon serviter zis pour relev bann tribi Zakob e ranmenn leres Izrael ver mwan. Mon pou fer ou vin en lalimyer bann nasyon, pour ki tou zabitan later antye ava ganny sove par mwan.

⁷ La sa ki SENYER i deklare, Sover Izrael, son Bondye ki Sen, avek sa enn ki ganny meprize, deteste par bann nasyon, lesklav bann dirizan: Ler bann lerwa ava war ou, zot ava debout e bann sef ava prosternen lafas ater. Sa pou arive akoz SENYER i fidel e Sen Izrael, in swazir ou.

Zerizalenm Pou Ganny Restore

⁸ La sa ki SENYER i deklare: Dan letan favorab, mon ti reponn ou. Zour delivrans, mon ti sekour ou; mon'n gard ou pour fer ou vin en lalyans pour lepep, pour ou relev sa pei e partaz bann patrimwann ki'n reste abandonnen;

⁹ pour ou dir avek bann prizonnyen: Sorti! Avek dimoun ki viv dan fernwanr: Montre zot! Zot pou kapab ganny nouri dan semen e lo bann montanny.

¹⁰ Zot pou nepli lafen, zot pou nepli swaf; ni divan so ni soley pa pou fer zot soufer, akoz zot gid pou sa enn ki annan konpasyon pour zot e ki pou kondwir zot kot i annan sours delo.

¹¹ Mon pou transform montanny e fer semen; mon pou refer bann grannrout.

¹² La zot la; zot in arive sorti lwen, zot sorti, en bann dan Nor, en bann dan Was, lezot dan Sid, dan Lezip.

¹³ Lesyel! Sant ou lazwa. Later! Rezoui ou. Bann montanny! Fer tande zot bann sanson. SENYER in konsol son pep; in pran konpasyon pour sa bann ki pe soufer.

¹⁴ Me Siyon ti dir: SENYER in abandonn mwan; mon SENYER in oubliy mwan.

¹⁵ Eski en fanm i kapab oubliy son pti baba ki i pe donn tete? Pa i annan konpasyon pour sa zanfan ki i'n donn nesans? Menm si i oubliy li, mwan mon pa pou oubliy ou.

¹⁶ La mon grav ou non dan mon de plak lanmen. Mon pa pou tir mon lizye lo ou bann miray.

¹⁷ Ou bann zanfan pe depese pour vin konstri; sa bann ki ti detri e kraz ou, pe kit pei.

¹⁸ Lev ou lizye e get otour ou; zot tou zot pe rasanble, zot pe vin kot ou. SENYER i deklare: Osi vre ki mon vivan, zot pou port tou, parey en zoli bizou; zot pou abiy parey en zenn marye.

¹⁹ I vre ki ou bann zabitan pou santi zot sere lo sa later ki'n ganny devaste, en landrwa dezer, en landrwa ki'n ganny detri, e bann ki ti oule devor ou ava'n fini ale.

²⁰ Sa bann zanfan ki ou'n ganny dan letan difisil pou dir dan ou zorey: Sa landrwa i tro sere; fer plas pour mwan kapab reste.

²¹ Alor, dan ou leker ou pou dir: Lekel ki'n donn mwan tou sa bann zanfan? Mon pa ti annan okenn zanfan e mon ti steril. Mon ti annegzil e mon ti ganny delese. Alor, lekel ki'n donn mwan tou sa bann zanfan? Mon ti'n ganny abandonnen. Alor, kote sa bann zanfan i sorti?

²² La sa ki Senyer BONDYE i deklare: Byento mon pou lev mon lanmen avek bann nasyon e fer en siny avek bann pep; zot ava anmenn ou bann garson dan zot lebra, e ou bann fiy lo zot zepol.

²³ Bann lerwa ki pou vin zot titer e bann prenses zot nouris. Zot pou prosternen devan lafas later e lis lapousyer lo ou lipye. Alor, ou ava konnen ki mwan menm SENYER. Sa bann ki met konfyans dan mwan pa pou kanmi.

²⁴ Lekel ki kapab repran larises ki en gerye in sezi avek lennmi? Oubyen en prizonnyen dan lanmen en diktater?

²⁵ La sa ki SENYER i deklare: Menm prizonnyen en diktater pou ganny libere, pou ganny arase avek en tiran. Annefe, mon pou atak bann ki atak ou e mon pou sov ou bann zanfan.

²⁶ Mon pou fors bann ki kraz ou, manz zot prop laser e bwar zot prop disan konmsi diven. Alor, tou et vivan ava konnen ki mwan menm zot SENYER, zot Sover e zot Redanmter, Bondye pwisan dan Zakob.