Ezai 48 - Labib An Kreol Seselwa

Bondye I Senyer Lavenir

¹ Desandan Zakob, zot ki port non Izrael, e zot ki sorti dan leren Zida! Ekoute. Zot ki pret serman lo non SENYER e envok Bondye Izrael, me zot pa ni senser, ni lwayal.

² Zot tir zot lafyerte dan lavil sen e zot depann lo Bondye Izrael ki apel SENYER liniver.

³ Bann levennman ki mon'n anons par mon labous, ki mon'n fer konnen depi lontan, la en sel kou, mon'n azir e fer zot vin realite.

⁴ Akoz mon konnen ki zot antete, ki zot likou i red parey en bar fer e zot fron i an bronz,

⁵ depi lontan mon'n anons tousala; mon'n fer konnen avan zot arive. Konmsa, ou pa pou kapab dir: Mon bann zidol ki'n fer sa; mon bann bondye an bwa oubyen an metal ki'n ordonn sa.

⁶ Ou tande! Get tou sa ki'n arive. Eski ou pa pou anonse? Apartir konmela, mon pe fer ou antann bann keksoz nouvo, bann keksoz ki mon'n gard sekre e ki ou pa ti konnen.

⁷ Sa bann keksoz in ganny kree aprezan; me ou pa ti'n antann nanryen avan sa. Alor, ou pa pou kapab dir: Mon ti konnen deza.

⁸ Zanmen ou'n tande, zanmen ou'n konnen; depi lontan, ou zorey in reste bouse. Akoz mon ti konnen ki ou pa ti en tret e ki depi avan ou nesans, zot apel ou en rebel.

⁹ Pour loner mon non, mon pou kontrol mon lakoler; pour loner mon laglwar, mon pasyant ankor, pour mwan pa fer ou disparet.

¹⁰ Gete! Mon'n pirifye ou dan dife, pa parey larzan i ganny pirifye, me mon'n fer ou pas dan dife lafliksyon.

¹¹ Mon fer sa pour mon prop loner; wi, pour mon prop loner. Annefe, mon pa pou les mon non ganny sali. Mon pa pou donn personn mon laglwar.

Siris, Sef ki Senyer In Swazir

¹² Zakob! Ekout mwan. Izrael mon'n apel ou: Mwan menm premye; mwan menm dernyen.

¹³ Mwan ki'n poz fondasyon later; par mon lanmen drwat mon'n deroul lesyel; ler mon apel zot, Toudswit, zot reponn lapel.

¹⁴ Rasanble e ekoute zot tou! Lekel parmi zot ki'n deza anons tousala? Sa enn ki SENYER i kontan pou realiz sa ki i'n deside kont Babilonn e son lebra pou leve kont bann Babilonyen.

¹⁵ Mwan menm! Zis mwan ki'n koze e ki'n apel li. Mon'n fer li vini, e son travay pou reisi.

¹⁶ Apros kot mwan! Ekout mwan! Depi konmansman mon pa'n koz an sekre. Mon ti la byen avan tousala. Aprezan, Senyer BONDYE in anvoy mwan avek son lespri.

Plan Bondye pour Sov Son Pep

¹⁷ La sa ki SENYER ou Sover, Bondye Sen Izrael i deklare: Mwan SENYER, ou Bondye. Mon ansenny ou pour ou prop dibyen; mon kondwir ou lo semen ki ou devre swiv.

¹⁸ Si selman ou ti'n ekout mon bann komannman! Alor, ou ti ava'n prospere parey en larivyer e ou bann reisit parey bann laroul dan lanmer.

¹⁹ Ou desandan ti ava'n vin parey disab e ou bann zanfan parey gren disab. Zot non pa ti pou zanmen ganny oubliye, ni disparet devan mwan.

²⁰ Sorti dan Babilonn! Sove! Kit bann Kaldeen. Kriye dan lazwa! Proklanmen! Fer tande ziska dan lot bout later. Dir: SENYER in sov son serviter Zakob.

²¹ Zot pa ti swaf ler i ti gid zot atraver bann dezer; pour zot, i ti fer delo koule, sorti dan ros; i ti fann ros e fer delo sorti ladan.

²² SENYER i deklare: Napa lape pour dimoun ki move.