Ezai 47 - Labib An Kreol Seselwa

Zizman lo Babilonn

¹ Babilonn, lavil vyerz! Desann lo ou tronn rwayal e vin asiz dan lapousyer. Fiy Babilonn! Vin asiz ater, san ou tronn. Ou pou nepli ganny apele Babilonn sansib e delika.

² Pran en ros, kraz lagrenn, prepar lafarin. Tir ou vwal, lev ou rob, montre ou lazanm pour ou travers bann larivyer.

³ Dimoun ava war ou touni e zot ava war sa ki fer ou laont. Mon pou revanze e mon pa pou eparny personn.

⁴ Nou sover i apel SENYER liniver. Li menm Bondye Sen, Izrael!

⁵ Bann fiy Babilonn! Asiz an silans dan fernwanr. Zot pou nepli ganny apele: Larenn bann Rwayonm.

⁶ Mon ti ankoler kont mon pep. Mon ti'n dezonor mon patrimwann; mon ti livre zot dan ou lanmen. Ou pa'n montre okenn konpasyon pour zot; ou'n plas en fardo byen lour lo ledo bann vyeyar.

⁷ Ou'n dir: Mon pou reste larenn pour touzour. Ou pa'n reflesir lo tousala; ou pa'n mazin son rezilta.

⁸ Aprezan, zot ki kontan lavi plezir, ekoute! Zot ki pe asiz dan sekirite, ki dir dan zot leker: Mwan ki la; napa koman mwan. Mon pa pou asiz koman en vev, ni konnen ki savedir perdi zanfan.

⁹ Sa de keksoz pou tonm lo ou en sel kou dan en sel zour: Ou pou perdi zanfan ek vin vev. Sa pou tap ou avek tou son lafors. Tou ou sorsye ek tou ou mazisyen pa pou anpes sa arive.

¹⁰ Ou annan konfyans dan ou bann move pratik e ou mazinen: Personn pa war mwan. Ou swadizan lasazes ek ou konnesans in anmenn ou lo move semen e ou ti dir dan ou leker: Mwan ki la; napa koman mwan!

¹¹ Me maler pou tonm lo ou san ki ou pou kapab eparny li. Dezas pou tonm lo ou e ou pa pou kapab evit li. Ou pou tonm dan larin en sel kou, san ki ou annan okenn lide.

¹² Kontinyen avek ou bann sorsye ek mazisyen ki ou'n pratike avek depi ou lazenes. Petet ou ava kapab reisi; petet ou ava kapab fer dimoun per.

¹³ Ou'n fatig ou afors demann konsey. Les dimoun ki etidye lesyel vin sov ou; les sa bann ki lir dan bann zetwal, ki sak nouvellin i anons zot sa ki pou arive, les zot vin sov ou.

¹⁴ Zot parey lapay; en dife pou bril zot; zot pa pou kapab sape dan pouvwar son laflanm. Sa, pa labrez kot ou kwi dipen, ni dife kot ou asiz devan.

¹⁵ La sa ki pou arive avek sa bann pour ki ou'n rente; sa bann avek ki ou'n trafike depi ou lazenes. Zot tou, zot in ale, sakenn dan son kote; napa personn pour sov ou.