Ezai 46 - Labib An Kreol Seselwa

¹ Bel in tonm azenou; Nebo in kourbe. Zot bann zidol in ganny met lo ledo zannimo e lo ledo bef. Avan, zot ti fer gran seremoni. Aprezan, zot saroy li lo ledo zannimo ki fatige.

² Zot pliye anba sa fardo, zot tonm azenou, zot pa'n kapab sov zot stati e zot osi zot in ganny deporte.

³ Tribi Zakob! Ekout mwan. Zot tou bann restan pep Izrael, zot ki mon'n pran swen depi dan vant zot manman, depi zot nesans.

⁴ Mon pou reste parey ziska ler zot vye; mon pou soutenir ou, menm ziska ler ou ganny seve blan. Mon'n fer li e mon pou kontinyen fer li; mwan menm ki pou soutenir ou e delivre ou.

⁵ Avek ki ou pou konpar mwan? Lekel ki egal avek mwan?

⁶ I annan ki gaspiy lor ki dan zot pos, ki pez larzan dan balans. Zot pey en lorfev pour li fer en bondye. Apre, zot tonm devan li e ador li.

⁷ Zot met li lo zot zepol e zot anmenn li; zot al depoz li dan son plas e i reste debout. I pa kapab bouze kot i ete. Si en dimoun i vin sipliy li, i pa reponn. I pa ni kapab sov personn dan son maler.

⁸ Bann revolte! Pa oubliy sa, e dan fon zot leker, mazin sa bann keksoz pase.

⁹ Mazin bann keksoz lontan akoz mwan menm Bondye, napa en lot. Mwan menm SENYER e napa en lot parey mwan.

¹⁰ Depi konmansman, mon'n anons lavenir e depi lontan davans, sa ki pa ankor arive. Mon'n dir davans: Mon pou realiz mon plan e mon pou rakont li tou sa ki fer mwan plezir.

¹¹ Mon apel en zwazo rapas ki dan Les. En zonm ki sorti dan en pei lwenten, pour egzekit mon bann proze. Sa ki mon prozete, mon pou fer li.

¹² Ekout mwan! Zot ki annan leker dir! Zot ki'n reste lwen avek lazistis.

¹³ Mon pe al egzekit mon lazistis, i pa lwen. Delivrans pa pou tarde. Mon pou anmenn delivrans Siyon, pour Izrael, mon laglwar.