Ezai 45 - Labib An Kreol Seselwa

Senyer I Apel Siris par Son Non

¹ La sa ki SENYER i deklare avek sa enn ki'n resevwar son lonksyon: Siris, sa enn ki i'n sezi par son lanmen drwat, pour met bann nasyon anba son pouvwar, pour tir batan bann laport devan li, pour detri pouvwar bann lerwa, pour ki bann laport pa reste fermen devan li:

² Mon pou mars devan ou; mon pou aplati bann bos dan ou semen. Mon pou kas bann laport an bronz e koup bann kouple an fer.

³ Mon pou donn ou bann trezor ki dan landrwa fernwanr, bann larises dan bann landrwa sekre. Konmsa, ou ava konnen ki mwan menm SENYER, Bondye Izrael ki apel ou par ou non.

⁴ Akoz Zakob mon serviter e Izrael ki mon'n swazi, mon apel ou par ou non. Menm si ou pa konn mwan, mon pou fer ou sa loner.

⁵ Mwan menm SENYER. Apard mwan, napa en lot Bondye. San ki ou konn mwan, mon'n prepar ou pour al lager,

⁶ pour ki, depi kot soley i leve, ziska kot i kouse, tou dimoun ava konnen ki apard mwan, napa en lot. Zis mwan ki SENYER e napa en lot.

⁷ Mwan ki fer lalimyer e kree fernwanr. Mon fer boner e mon fer maler. Mwan menm SENYER ki fer tousala.

⁸ Lesyel! Fer tonbe lazistis parey laroze. Bann nyaz ava fer tonbe satiman parey lapli. Later! Ouver e les delivrans fleri e fer bourzonnen lazistis. Mwan SENYER ki'n kree tousala.

⁹ Maler pour sa zonm ki argimant avek son Kreater. En po larzil avek en potye! Eski larzil i kapab demann avek son potye: Ki ou pe fer? Oubyen dir li: Ou travay pa bon!

¹⁰ Maler lo sa enn ki dir avek en papa: Ki kalite zanfan ou'n fer? Oubyen avek en fanm: Ki ou'n met omonn?

¹¹ La sa ki SENYER, Bondye Sen Izrael e son Kreater i deklare: Eski ou pou kestyonn mwan lo mon bann zanfan, oubyen donn mwan lord lo travay ki mon'n fer par mon lanmen?

¹² Mwan ki'n fer later e kree bann zonm ki viv lo la. Mwan menm ki'n tal lesyel; mwan ki komann bann larme zetwal.

¹³ SENYER liniver i deklare: Mwan ki'n lev Siris pour mon lazistis, mon pou tir tou lobstak lo son semen. I pou rekonstri mon lavil e rann laliberte mon pep ki annegzil, san pey okenn pri, san okenn rekonpans.

¹⁴ La sa ki SENYER i deklare: Mendev Lezip, komers bann Nibyen e bann Sabeen, sa bann zean pou pas dan ou lanmen e pou vin ou propriyete. Zot pou swiv ou atase avek lasenn e zot ava prostern devan ou. Zot ava sipliy ou: Bondye i avek ou e napa okenn lot.

¹⁵ Vreman ou en Bondye ki reste kasyet; Ou, Bondye Izrael, ki Sover!

¹⁶ Tou bann artizan ki fabrik zidol, zot ganny kouver avek laont ek konfizyon. Zot tou, zot ale dan konfizyon.

¹⁷ Me Izrael i ganny sove par SENYER; i sov li pour touzour. Zanmen i pou ganny kouver avek laont ni ganny ensilte.

¹⁸ La sa ki SENYER i deklare, li ki'n kreater lesyel; sa Bondye ki'n kree later, ki'n form li e soutenir li; i pa'n kree li pour reste vid; me, i'n form li pour ki i ganny abite: Mwan menm SENYER, napa okenn lot.

¹⁹ Mon pa'n koz an sekre dan en pei ki dan fernwanr. Mon pa ti dir avek bann desandan Zakob: Rod mwan dan vid! Mwan SENYER, sa ki mon i vre. Sa ki mon dir i drwat.

Senyer Liniver ek Bann Zidol Babilonn

²⁰ Rasanble! Zot sirvivan bann nasyon. Aprose! Met zot ansanm. Zot pa konn nanryen, sa bann ki pronmnen avek zot zidol an bwa. Zot kontinyen sipliy en bondye ki pa kapab sov zot.

²¹ Koze! Prezant zot ka. Diskit ansanm avek kanmarad. Lekel ki'n fer konnen tousala depi lontan? Lekel ki'n anons tousala? Pa mwan, SENYER? Napa okenn lot bondye apard mwan, en Bondye ki zis e Sover. Napa okenn lot bondye apard mwan.

²² Zot tou ki reste dan bout later, retourn kot mwan e zot ava ganny sove. Akoz mwan menm ki Bondye e napa okenn lot.

²³ Mon fer serman lo mwan menm: Sa laverite ki sorti dan mon labous i zis, mon annan en sel parol. Tou bann imen pou prostern devan mwan e tou nasyon pou pret serman.

²⁴ Zot pou dir lo mwan: Zis SENYER ki annan lazistis ek pwisans. Tou sa bann ki ti ankoler kont mwan pou retourn ver mwan dan laont.

²⁵ Tou bann desandan Izrael ava ganny zistifye e zot ava met zot konfyans dan SENYER.