Ezai 44 - Labib An Kreol Seselwa

Senyer I Sel Bondye

¹ Aprezan, ekout mwan, Zakob mon serviter, Izrael ki mon'n swazir!

² La sa ki SENYER ki'n fer ou, ki'n form ou dan vant ou manman e ki pou ed ou, i deklare: Zakob mon serviter! Pa per. Yesouroun! Ou, ki mon'n swazir!

³ Annefe, mon pou aroz sa later ki swaf e fer koule bann sours lo later ki sek. Mon pou donn mon lespri ou desandans e mon benediksyon ou bann prozenitir.

⁴ Zot pou pouse parey zerb ver dan laplenn, parey pye var obor delo.

⁵ Enn pou dir: Mwan mon pour SENYER. En lot pou dir: Mon en desandan Zakob. En lot ankor pou ekri lo son lanmen: Propriyete SENYER; i pou port non Izrael.

⁶ La sa ki SENYER, lerwa Izrael son Sover, SENYER liniver i deklare: Mwan menm premye, mwan menm dernyen. Apard mwan, napa okenn lot Bondye.

⁷ Lekel ki parey mwan? Fer konnen. Vin deklar devan mwan sa ki'n arive. Deklar li, eksplik mwan tou sa ki'n arive depi ki mon ti form premye pep dan letan pase. Vin anons sa ki pou arive dan lavenir ek keksoz ki devre arive.

⁸ Pa per, pa tranble. Pa mon'n fer ou konnen e anons depi byen lontan? Zot mon temwen! Eski i annan en lot Bondye apard mwan? Mwan, ki zot ros; mon pa konn en lot.

Adorasyon Zidol pa Fer Sans

⁹ Bann fabrikan zidol pa vo nanryen e zot pli zoli travay pa servi dan nanryen. Sa bann stati i zot temwen. Zot bann temwen ki pa war nanryen, ki pa konn nanryen, ki pe kouver zot avek laont.

¹⁰ Lekel ki pou fabrik en bondye oubyen moul en stati ki pa servi dan nanryen?

¹¹ Tou bann adorater pou ganny kouver avek laont: Son bann zabitan, zot zis bann imen. Zot tou, rasanble! Prezant zot debout! Zot pou fer per; zot tou, zot pou ganny kouver avek laont.

¹² Forzron i fer en sizo; i sof li dan labrez. Akoud marto, i donn li en laform, avek lafors son gro lebra. Me ler i lafen i perdi lafors; si i pa bwar delo, i feb.

¹³ Sarpantye i tras en laliny avek en lakord, i desin avek lakre e mark avek konpa; i fer li en laform imen. I donn li en zoli tournir zonm e i met li dan en lakaz.

¹⁴ I koup en zoli pye dibwa parey en pye sed. I swazir en morso dibwa, solid parey bwadnat oubyen en lot kalite pye dibwa ki i'n les grandi. Oubyen i'n plant en pye sed ki lapli in fer pouse.

¹⁵ Sa dibwa i ava kapab servi pour alim dife. En bout i ava servi pour sof li avek. I alim en dife pour li kwi manze. Avek en lot bout, i fabrik en zidol ki i adore. I fabrik en stati e fer reverans devan li.

¹⁶ Avek lanmwatye son morso dibwa, i'n alim dife e roti lavyann, ki i manze ziska i rasazye. I osi servi sa dibwa pour sof li avek, e i dir: A! Mon ganny byen so! Mon santi lasaler dife.

¹⁷ Avek leres dibwa, i fer en bondye, son zidol. I azenou devan li e ador li; i priy avek li e i dir: Sov mwan, akoz ou ki mon bondye!

¹⁸ Zot pa konn nanryen; zot pa konpran nanryen. Zot lizye i bouse, zot pa war kler; zot lespri i bornen; zot pa ni war, ni konpran nanryen.

¹⁹ Personn pa reflesir dan li menm; personn napa lentelizans ek disernman pour dir: Mon'n bril lanmwatye sa dibwa; mon'n osi kwi manze lo labrez, mon'n roti lavyann ki mon'n manze. Aprezan mon pou fer en stati degoutan avek leres. Mon pou fer reverans devan en morso dibwa.

²⁰ I nouri li lo sa ki reste zis lasann. Son lespri pe derezonnen i nepli kapab disernen. I nepli kapab dir dan li menm: Sa ki dan mon lanmen drwat, i zis en fo?

Senyer I Kreater e Sover

²¹ Rapel sa Zakob! Ou osi, Izrael! Akoz ou mon serviter. Mon'n form ou pour ou vin mon serviter. Izrael! Mon pa pou oubliy ou.

²² Mon'n balye ou bann fot parey en nyaz e ou bann pese parey en brouyar. Retourn kot mwan akoz mon'n sov ou.

²³ Lesyel sant bann kantik lazwa akoz SENYER in azir. Profonder later! Fer monte ou lazwa. Bann montanny! Fer tande zot selebrasyon; lafore osi avek tou ou bann pye dibwa: SENYER in sov Zakob; i'n montre son laglwar dan Izrael. Akoz SENYER i'n sov Zakob e in manifeste son laglwar dan Izrael.

²⁴ La sa ki SENYER ou Sover ki ti form ou dan vant ou manman i deklare: Mwan menm SENYER ki'n kree tou keksoz. Tousel mon'n deroul lesyel e tousel, mon'n tal later.

²⁵ Mon defet siny bann ki vantar e fer bann deviner derezonnen e rann zot konnesans bet.

²⁶ Mon fer realize parol mon serviter e fer arive sa ki mon bann mesaze i anonse. Mon dir lo size Zerizalenm: I pou ganny abite. Konsernan bann lavil dan Zida: Zot ava ganny rekonstri e remet an valer sa ki'n ganny devaste.

²⁷ Mwan ki dir avek losean: Vin sek. Mon pou fer sek bann larivyer.

²⁸ Mon'n deklare lo size Siris: I mon berze i pou akonpli tou sa ki fer mwan plezir. Lo size Zerizalenm: I pou ganny rekonstri. Lo size tanp: Ou fondasyon pou ganny retabli.