Ezai 41 - Labib An Kreol Seselwa

Bondye I Redonn Lasirans Izrael

¹ La sa ki SENYER i deklare: Bann zil! Gard silans pour ekout mwan! Bann pep! Repran zot lafors. Aprose e koze! Ansanm, annou apros devan tribinal.

² Lekel ki'n fer vini en konkeran sorti dan Les e donn li laviktwar partou kot i ale? Lekel ki'n donn li laviktwar lo bann nasyon e met bann lerwa anba son dominasyon? Son lepe, i fer zot vin lapousyer. Son fles i fer zot fannen parey lapay dan divan.

³ I pourswiv zot e ganny laviktwar telman vit partou kot i pase, ki son lipye i apenn tous later.

⁴ Lekel sa enn ki'n rakont li tousala? Li menm sa enn ki'n konvok bann zenerasyon depi konmansman. Mwan menm SENYER ki premye e mon pou ankor avek bann ki dernyen!

⁵ Bann zil in war e zot per; later antye i tranble. Zot pe aprose, zot pe vini.

⁶ Sakenn pe ed kanmarad. Enn pe dir avek lot: Pran kouraz!

⁷ Artizan pou ankouraz lorfev. Sa enn ki travay avek marto pou ankouraz forzron lo lanklim. I dir: Lasoudir in byen pran! Zot klout sa zidol pour li pa branle.

⁸ Me ou, Izrael, mon serviter, Zakob ki mon'n swazir; desandans Abrahanm, mon zanmi;

⁹ mon'n ranmenn ou depi dan bout later mon'n apel ou depi bann kwen pli elwannyen. Avek ou ki mon ti dir: Ou menm mon serviter! Mon'n swazir ou e mon pa'n rezet ou!

¹⁰ Pa bezwen per, akoz mon avek ou. Pa bezwen enkyet, akoz mwan menm ou Bondye. Mon pou rann ou for, mon pou ed ou, mon pou soutenir ou avek mon lanmen ki donn laviktwar.

¹¹ Tou bann ki fase avek ou pou ganny kouver avek laont ek imilyasyon. Tou bann ki pe rod fer lager kont ou pou ganny detri e disparet.

¹² Ou pou rod sa bann ki kont ou; me ou pou nepli war zot. Sa bann ki pe fer lager kont ou pou ganny detri e zot pou vin en nanryen ditou.

¹³ Mwan menm SENYER ou Bondye ki tenir ou par ou lanmen drwat e dir ou: Pa bezwen per, mon la pour sekour ou.

¹⁴ La sa ki SENYER i deklare: Zakob! Ou zis en lever. Me pa bezwen per, akoz mon pou vin sekour ou. Ou Sover, se li menm Bondye Sen dan Izrael!

¹⁵ Mon pou fer ou vin en zouti pour bat dible, avek lapwent byen fite. Ou pou kraz bann montanny e transform zot an lapousyer e ou pou fer bann kolin vin lapay.

¹⁶ Ou pou vann zot e zot pou anvole dan divan; tanpet pou dispers zot. Apre sa, ou pou dan lazwa akoz SENYER; ou pou met ou lafyerte dan Bondye sen Izrael.

¹⁷ Bann pov ek bann malere ava rod delo, me pou napa. Zot lalang i sek avek laswaf; mwan SENYER, mon pou reponn zot; mwan Bondye Izrael, mon pa pou abandonn zot.

¹⁸ Mon pou fer larivyer koule sorti dan montanny sek e bann sours sorti dan milye bann vale. Mon pou fer dezer vin en lak; sours pou koule dan bann teren sek.

¹⁹ Mon pou fer pye sed, akasya, mirt ek pye zoliv pouse dan dezer. Dan bann landrwa sek, mon pou fer pouse ansanm, toudsort pye dibwa.

²⁰ Konmsa, tou dimoun ava kapab war e konnen; zot tou, zot ava kapab obzerve e konpran ki lanmen SENYER ki'n fer tousala, ki Bondye sen Izrael ki'n kree tousala.

Senyer I Lans en Defi bann Zidol

²¹ SENYER i deklare: Prezant ou ka, Anmenn ou bann laprev, lerwa Zakob i deklare.

²² Anmenn sa bann laprev e montre nou sa ki pou arive. Dir nou sa ki'n arive dan lepase; konmsa, nou ava pran zot an kont e nou ava konnen sa ki pou arive; oubyen, anons nou lavenir.

²³ Dir nou sa ki pou arive apre; konmsa, nou ava konnen ki zot en bann bondye. Fer en keksoz, byen ou mal, ki pou fer nou per e tranble.

²⁴ Zot pa vo nanryen. Zot pa kapab fer nanryen. Swazir ou koman son bondye, i en keksoz degoutan.

²⁵ Mon'n apel en zonm sorti dan Nor; i'n arive sorti Les. In ganny apele par son non. I pou kraz bann dirizan parey labou; parey en potye i kraz larzil.

²⁶ Lekel ki'n anons sa depi konmansman pour ki nou kapab konnen? Lekel ki'n anonse depi lontan davans pour nou dir: Wi! I vre! Napa personn ki'n anonse, napa personn ki'n fer nou tande, napa personn ki'n antann ou parol.

²⁷ Mwan ki ti premye pour anons sa bon nouvel Zerizalenm: Gete! Ou pep pe retournen!

²⁸ Mon ti gete: Napa personn parmi zot ki ti kapab donn en konsey; Napa personn parmi zot ki ti kapab reponn.

²⁹ Zot tou, zot en bann nanryen ditou; zot travay pa vo nanryen; zot bann zidol i vid, zot en nanryen ditou.