Ezai 40 - Labib An Kreol Seselwa

Parol Lespwar

¹ Konsole mon pep! Konsole mon pep, ou Bondye i dir.

² Avek tandres, koz avek Zerizalenm! Fer li konnen ki son letan lesklavaz in fini; ki son pese in ganny pardonnen; ki SENYER li menm in fer li pey doub pour tou son bann fot.

³ En lavwa i kriye: Prepar en semen dan dezer pour SENYER; nivle en larout pour nou Bondye.

⁴ Tou bann vale pou ganny Konble; tou bann montanny ek tou kolin pou ganny aplati; bann teren abos pou vin drwat; la kot i annan bann ros pou vin plat.

⁵ Alor, laglwar SENYER ava ganny devwale; tou bann pep ava war. SENYER in dir par son prop labous.

⁶ En lavwa i dir: Kriye! Alor mon ti reponn: Ki mon pou kriye? Tou imen i parey zerb, zot fidelite pa dire parey bann fler dan laplenn.

⁷ Zerb i sek e fler i fletri ler SENYER i soufle lo zot. Vreman, lepep i parey zerb.

⁸ Zerb i vin sek, fler i fletri, me parol nou Bondye pou dire pour touzour.

⁹ Siyon! Ou ki anmenn bon nouvel, mont lo latet en gran montanny. Zerizalenm! Ou ki anmenn bon nouvel, kriy avek tou ou lafors. Fer tande ou lavwa! Pa bezwen per! Al dir ek bann lavil dan Zida: Ou Bondye i la!

¹⁰ La Senyer BONDYE pe vini avek pwisans. Son lebra i donn li tou dominasyon. I anmenn saler son travay e son rekonpans i devan li.

¹¹ Parey en berze i fer, i pou vey lo son troupo. I pou rasanble bann mouton dan son lebra e anmenn zot lo son leker. Dousman, i ava gid bann manman mouton.

Napa Personn koman Bondye Izrael

¹² Lekel ki'n deza mezir delo dan son lanmen e ki'n fikse lesyel avek son plak lanmen? Lekel ki'n fer antre tou lapousyer later dan en mezir? Lekel ki'n deza pez bann montanny ek kolin lo en balans?

¹³ Lekel ki'n deza mezir lespri SENYER? Lekel ki Bondye in swazir koman son konseye?

¹⁴ Lekel ki SENYER in konsilte pour enstri li? Lekel ki'n montre li semen lazistis pour bon zizman? Lekel ki'n donn li konnesans? Lekel ki'n montre li semen lentelizans?

¹⁵ Bann nasyon i parey en gout delo obor en seo. Zot pa pez plis ki lapousyer dan en balans. Zabitan bann zil pa pez plis ki en gren lapousyer ki anvole.

¹⁶ Liban pa fourni ase bwafe. Napa ase zannimo pour sakrifis konplet.

¹⁷ Bann nasyon, zot nanryen ditou devan li. Dan son lizye, zot pou mwens ki nean.

¹⁸ Avek ki alor ou pou konpar Bondye? Lekel ki resanble li?

¹⁹ En zidol? En artizan ki donn li en laform, en lorfev ti kouver li avek lor e moul bann kolye annarzan pour met li.

²⁰ Sa enn ki tro pov pour fer en tel lofrann, i swazir en morso dibwa byen dir. I pou rod en bon artizan ki kapab fer en stati ki tenir san branle.

²¹ Eski zot pa ti konnen? Eski zot pa'n tande? Pa in ganny dir depi konmansman? Zot pa ankor konpran ki mannyer in ganny formen?

²² Li menm SENYER ki reste par lao serk ki kouver later e son bann zabitan, zot parey sotrel. In tal lesyel parey en vwal leze. I tal li parey en latant pour zot reste.

²³ I abes bann sef e rann bann dirizan later koman nanryen ditou.

²⁴ Zot parey bann zenn plant: Apenn ki zot in ganny plante, apenn senmen, zot tron pa'n ni ganny letan pour pran rasin, deza SENYER in soufle lo zot, e fer zot fletri e zot anvole dan tourbiyon parey lapay.

²⁵ Avek ki alor ou pou konpar Bondye? Lekel ki resanble li? Bondye Sen i demande.

²⁶ Lev ou lizye lao e gete: Lekel ki ti kree tousala? Sa enn ki mobiliz son larme, ki apel sakenn zot par son non, par son gran pouvwar e son gran lafors, san ki en sel i manke.

²⁷ Zakob! Akoz ou dir? Izrael! Akoz ou repete: Ki pe arive ek mwan? Mon Bondye pa pran ka pour mwan.

²⁸ Eski zot pa konnen? Eski zot pa'n tande? SENYER ki Bondye depi touzour e pour touzour, i Kreater later antye. I pa zanmen afebli; zanmen i fatige, son lentelizans napa okenn limit.

²⁹ I donn lafors sa enn ki fatige e kouraz sa enn ki'n randi.

³⁰ Menm lazenes pou afebli e fatige e bann zennzan pou zis tonbe.

³¹ Me sa bann ki met zot konfyans dan SENYER ava reganny zot lafors; zot ava anvole parey en leg; zot ava taye, me zanmen fatige; zot ava marse san rente.