Ezai 4 - Labib An Kreol Seselwa

¹ Sa zour, set fanm pou anpandan avek en sel zonm. Zot pou dir li: Nou ava rod nou manze nou menm, nou ava met nou prop lenz. Zis donn nou ou non. Fer disparet nou laont.

Zerizalenm pou Ganny Rekonstri

² Sa zour, SENYER pou fer pouse dan pei sa pou loner ek laglwar. Bann fri sa pei pour fer lafyerte ek laglwar bann sirvivan Izrael.

³ Alor, sa ki'n reste Siyon, bann sirvivan dan Zerizalenm pou ganny apele sen. Tou sa bann ki zot non i'n ganny anrezistre pou kapab viv dan Zerizalenm.

⁴ Apre, SENYER ava lav salte bann zabitan Siyon e netway disan ki dan Zerizalenm par en souf lazistis e destriksyon.

⁵ Alor, SENYER ava kree lo montanny Siyon e lo bann lasanble ki'n ganny konvoke, en nyaz avek lafimen pandan lazournen, e en laklerte koman en laflanm dife pandan lannwit. Konmsa, laglwar SENYER pou kouver tou,

⁶ parey en proteksyon kont lasaler lizour en twa e en labri kont tanpet ek lapli.