Ezai 39 - Labib An Kreol Seselwa

Bann Mesaze Sorti Babilonn

¹ Dan sa menm letan, lerwa Merodak-Baladann, garson Baladann ki sorti Babilonn, ti anvoy let ek kado pour Ezekyas, akoz i ti'n tande ki i ti malad e i'n geri.

² Ezekyas ti byen akey zot. I ti montre zot, tou son bann trezor: Larzan, lor, bann zepis, bann delwil parfimen, tou son bann magazen zarm ek tou sa ki ti dan son bann kof. Ezekyas pa ti kasyet nanryen; i ti montre zot tou sa ki ti annan dan son pale e dan tou son rwayonm.

³ Profet Ezai ti al kot lerwa Ezekyas. I ti dir li, “Ki sa bann zonm in dir? Kote zot sorti?” Ezekyas ti reponn, “Zot sorti dan en pei lwen, Babilonn, pour zot vin war mwan.”

⁴ Ezai ti dir, “Ki zot in war dan ou pale?” Ezekyas ti reponn, “Zot in war tou sa ki dan mon pale. Napa nanryen dan mon bann magazen ki mon pa'n montre zot.”

⁵ Alor Ezai ti dir Ezekyas, “Ekout parol SENYER:

⁶ Bann zour pe vini kan tou sa ki dan ou pale e tou sa ki ou bann zanset ti'n anmase ziska ozordi, pou ganny anmennen Babilonn. Napa nanryen ki pou reste. SENYER ki deklare.

⁷ Serten parmi ou bann prop garson ki ou'n fer, pou ganny anmennen; zot pou servi koman enik dan pale lerwa Babilonn.”

⁸ Ezekyas ti dir Ezai, “Parol SENYER ki ou'n dir mwan i bon.” I ti pe mazinen dan li menm: Pou annan lape ek sekirite pandan mon lavi.