Ezai 38 - Labib An Kreol Seselwa

Maladi Lerwa Ezekyas ek Son Gerizon

¹ Dan sa letan, Ezekyas ti tonm malad e i ti pre pour mor. Profet Ezai, garson Amoz ti vin kot li. I ti dir li: La sa ki SENYER i deklare: Met lord dan ou bann zafer, akoz ou pou mor; ou pa pou geri.

² Ezekyas ti vir son figir kont miray e i ti priy SENYER:

³ SENYER! Mon enplor ou! Pa oubliy mwan, e ki mannyer mon'n mars devan ou avek lwayote e avek en leker senser, e fer sa ki drwat devan ou. Apre, Ezekyas ti plere amerman.

⁴ Alor, SENYER ti donn Ezai sa lord:

⁵ Al dir Ezekyas: La sa ki SENYER, Bondye ou zanset David i deklare: Mon'n antann ou lapriyer. Mon'n war ou bann larm; mon pou azout 15 an lo ou lavi.

⁶ Mon pou delivre ou ek sa lavil dan lanmen lerwa Asiri. Mon pou defann sa lavil.

⁷ SENYER pour donn ou en siny koman laprev ki i pou realiz sa ki i'n promet:

⁸ Mon pou fer lonbraz ki lo kadran soley retourn 10 degre. Annefe, soley ti retourn 10 degre an aryer lo sa ki i ti'n deza kouver.

⁹ La poenm ki Ezekyas, lerwa Zida ti ekri apre son maladi, kan i ti'n geri:

¹⁰ Mon ti dir dan mwan menm: Mon apenn lanmwatye mon lavi e deza mon bezwen ale. Mon'n ganny kondannen pour pas leres mon lavi devan lemonn lanmor.

¹¹ Mon ti dir ki mon pou nepli war SENYER lo later bann vivan; mon pa pou war bann et imen ankor parmi bann zabitan lemonn.

¹² Mon'n ganny arase mon lavi e i ganny anvole parey latant en berze; mon lavi in ariv dan son bout konmsi en roulo latwal ki sorti lo masin; son bann difil in ganny koupe. Dan en sel zour, ou ava'n fini avek mwan.

¹³ Tou lannwit mon'n pasyante. In kraz tou mon lezo parey en lyon. Dan en sel zour ou ava'n fini avek mwan.

¹⁴ Mon kriye parey en zirondel; mon plennyen parey en tourtrel. Mon lizye i fatige afors get anler ver lesyel. SENYER! Sekour mwan dan mon lapenn.

¹⁵ Me ki mon kapab dir? Li menm ki'n koz avek mwan; li menm ki'n fer sa. Mon nepli kapab dormi akoz mon dan en gran lapenn.

¹⁶ SENYER! Par ou bonte, ou gard nou vivan. Gras a ou ki mon ankor vivan. Ou ki'n retabli mwan e ki'n rann mwan mon lavi.

¹⁷ Mon lanmertim ti sirman pour mon prop boner ki mon ti dan latristes. Dan ou lanmour pour mwan, ou'n anpes mwan tonm dan lafos destriksyon; ou'n zet mon bann pese lwen deryer ou.

¹⁸ Lemonn lanmor pa kapab loue ou. Lanmor pa kapab selebre ou. Sa ki desann dan sa trou san fon pa kapab met lespwar dan ou fidelite.

¹⁹ Zis dimoun vivan, sa ki vreman vivan, ki kapab loue ou parey mon pe fer. Se bann paran ki fer zot zanfan konn ou fidelite.

²⁰ SENYER pou sov mwan. Nou pou sante avek lakonpannyman lanmizik tou le zour nou lavi, dan tanp SENYER!

²¹ Ezai ti'n dir: Prepar en kataplas avek fig sek e met lo son ilser; Ezekyas ava geri.

²² Ezekyas ti'n osi demande: Ki siny ki pou prouve ki mon pou kapab mont dan tanp SENYER?