Ezai 36 - Labib An Kreol Seselwa

Bann Asiriyen I Menas Zerizalenm

¹ Dan katorzyenm lannen lerwa Ezekyas, Senakerib, lerwa Asiri, ti atak e pran tou bann lavil fortifye dan Zida.

² Lerwa Asiri ti anvoy son Ed de kan sorti Lakis, avek en gran larme, kot lerwa Ezekyas Zerizalenm. Son zeneral ti debout pre avek tiyo rezervwar siperyer lo semen ki anmenn kot bann travayer latwal.

³ Alor, Eliakim, garson Hilkiya sef pale rwayal, ti sorti avek Sebna, son sekreter, ek Yoa, garson Asaf ki ti arsivis.

⁴ Sa Ed de kan Asiriyen ti dir zot: Al dir Ezekyas sa ki sa gran lerwa Asiri i dir: Dan lekel ki ou'n met ou konfyans?

⁵ Eski ou krwar ki zis parol i en stratezi ek lafors pour fer lager? Lo lekel ki ou pe met ou konfyans pour ou revolte kont mwan?

⁶ Ou pe met ou konfyans lo Lezip ki en banbou kase ki pers lanmen sa enn ki apiy lo la. La ki mannyer Faraon, lerwa Lezip, i ete pour tou sa ki met konfyans dan li.

⁷ Aprezan, ou ava dir: Nou'n met nou konfyans dan SENYER nou Bondye. Pourtan, ou menm Ezekyas ki ti detri bann landrwa sakre ek bann lotel? Ou ki ti ordonn Zida ek Zerizalenm: Ou ava ador SENYER devan sa lotel.

⁸ Vini aprezan! Fer en laranzman avek mon senyer, lerwa Asiri: Mon ava donn ou 2,000 seval, si ou kapab ganny kavalye pour mont zot.

⁹ Ki mannyer ou pou fer rekile en sel sef parmi bann serviter pli enferyer mon met, si ou pe depann lo Lezip pour ou ganny bann kales lager ek kavalye?

¹⁰ An plis, eski mon'n atak sa pei pour detri li san led SENYER? SENYER ki ti dir mwan: Al atak sa pei e detri li.

¹¹ Apre, Eliakim, Sebna ek Yoa ti dir Ed de kan Asiriyen: Silvouple, koz avek nou dan lalang Arameen, akoz nou konpran. Pa koz langaz Ebre devan sa bann zans ki debout lo miray.

¹² Me Ed de kan Asiriyen ti dir: Eski ou krwar ki mon met in anvoy mwan koz zis avek ou met ek ou, non pa avek bann zonm ki lo miray? Zot osi, zot pou bezwen manz zot leskreman e bwar zot lirin.

¹³ Apre, Ed de kan Asiriyen ti debout e kriy byen for dan langaz Ebre: Ekout parol gran lerwa Asiri!

¹⁴ Lerwa i dir: Pa les Ezekyas anbet zot, akoz i pa pou kapab delivre zot.

¹⁵ Pa les Ezekyas fer zot met zot konfyans dan SENYER kan i dir: SENYER pou delivre zot; sa lavil pa pou ganny livre dan lanmen lerwa Asiri.

¹⁶ Pa ekout Ezekyas, akoz la sa ki lerwa Asiri i dir: Fer lape avek mwan e vin lo mon kote! Sakenn zot pou manz son prop rezen e son prop fig e bwar delo son prop pwi,

¹⁷ ziska ki mon vini e anmenn zot dan en pei ki parey zot prop pei, en pei kot i annan dible ek diven, en pei kot i annan dipen ek plantasyon rezen.

¹⁸ Pa les Ezekyas anbet zot pour dir zot ki SENYER pou sov nou. Eski okenn bann bondye lezot nasyon in deza sov okenn pei dan lanmen lerwa Asiri?

¹⁹ Oli bann bondye Hamat ek Arpad? Oli bann bondye Sefarvaim? Eski zot in delivre Samari dan mon lanmen?

²⁰ Lekel parmi bann bondye sa bann pei, ki'n deza sov zot pei dan mon lanmen, pour ki SENYER i sov Zerizalenm dan mon lanmen?

²¹ Me zot ti reste trankil e personn pa ti reponn en mo. Lerwa ti'n donn lord pour pa reponn li.

²² Alor Elyakim, garson Hilkiya sef pale, Sebna, sekreter ek Yoa, garson Asaf ki ti arsivis, ti vin kot Ezekyas avek zot lenz desire; zot ti raport bann parol Ed de kan Asiriyen.