Ezai 35 - Labib An Kreol Seselwa

Lo Semen Sentete

¹ Dezer ek later desese pou dan lazwa! Dezer pou kontan e pou fleri avek zoli fler.

² I pou kouver avek fler. I pou sote, i pou sante e kriye avek lazwa. I pou ganny laglwar Liban ek labote montanny Karmel ek laplenn Saronn. Zot pou war laglwar SENYER, labote e grander nou Bondye.

³ Redonn lafors bann lanmen ki fatige; rann solid bann zenou ki pe tranble.

⁴ Al dir sa bann ki leker i ranpli avek lafreyer: Reste for! Pa bezwen per! La ou Bondye! I pe vin vanz pour ou, pour rann ou bann lennmi tou dimal ki zot in fer ou. I pou vin sov ou.

⁵ Alor, lizye bann aveg pou ouver; zorey bann sourd pou tande.

⁶ Bann ki bwete pou sote parey en serf e lalang bann kozpa pou sant dan lazwa. Delo pou sourse annabondans dan dezer e bann larivyer pou koule dan bann landrwa sek.

⁷ Disab so pou transform an en lak e later ki swaf pou vin en rezyon ranpli avek sours delo. La kot bann zannimo sovaz ti abitye reste, banbou ek zon pou pouse.

⁸ La ki ou annan en gran semen ki pou ganny apele: Semen Sentete. Dimoun enpir pa pou kapab pas par la. I pou ganny rezerve zis pou pep Bondye. Okenn vwayazer, ni menm bann fou pa pou rantre san fer atansyon.

⁹ Okenn lyon pa pou vin la; ni okenn lot zannimo sovaz. Zis dimoun ki SENYER in libere ki pou kapab pran sa semen.

¹⁰ Tou bann ki SENYER in libere pou retournen. Zot pou ariv Siyon dan lazwa. Zot figir pou reyonnen avek en boner san limit. Zot pou ranpli avek en gran lazwa. Soufrans ek latristes pou'n disparet.