Ezai 34 - Labib An Kreol Seselwa

Bondye I Ziz Son bann Lennmi

¹ Aprose bann nasyon! Vin ekoute! Bann pep! Port atansyon! Later avek tou son konteni! Ekoute! Lemonn avek tou sa ki i prodwi! Ekoute!

² SENYER i ankoler kont tou bann nasyon; i tre ankoler kont tou zot larme; in kondann zot pour ganny masakre.

³ Bann viktim pou ganny zete; zot kadav pe senm piyanter; Montanny pou ansan.

⁴ Tou bann larme lesyel pe pouri. Lesyel in roul roule parey en liv. Tou son larme pou grennen parey fey rezen ki'n fletri, oubyen parey fey fig ki'n fletri.

⁵ Mon lepe in aparet dan lesyel; i pou desann lo bann Edomit, lo sa pep ki mon'n kondannen pour destriksyon.

⁶ Lepe SENYER i kouver avek disan e avek lagres; avek disan bann zenn mouton ek bann bouk; avek lagres ronnyon bann mouton. SENYER in ofer en sakrifis dan Bosra; en masak terib dan pei Edonm.

⁷ Bann bef sovaz pou tonbe ansanm avek lepep; bann zenn bef ek bann toro feros. Pei pou enbib disan e later pou ganny enprenyen avek lagres.

⁸ I en zour vanzans pour SENYER; en lannen regle kont dan faver Siyon.

⁹ Delo bann larivyer ki koule dan Edonm pou vin goudron e son later pou vin souf; sa pei pou vin parey goudron ki pe brile.

¹⁰ I pou kontinyen brile lannwit koman lizour; lafimen pou mont ver lesyel pour touzour; i pou reste an rin pandan tou bann zenerasyon. Dimoun pou nepli pas par la.

¹¹ Votour ek ibou pou vin reste la, katiti ek korbo pou vin dormi la. SENYER ava tir latres konfizyon lo sa later e nivodo lo son bann nob.

¹² Pou nepli annan bann nob pour swazir lerwa e bann sef pou nepli.

¹³ Brousay pikan pou pous dan son bann pale; move zerb ek lalyann lo son bann miray. Lisyen maron pou vin reste la. Bann lotris ava ganny en labri.

¹⁴ Sat maron pou rankontre lisyen maron, bann bouk pou apel kanmarad; malfezan ava vin reste la, i ava ganny en landrwa repo.

¹⁵ La kot serpan pou fer son nik. I pou ponn son bann dizef; i pou kouve e pran swen avek. Bann votour pou rasanble la, par per.

¹⁶ Al fouye e lir dan Liv SENYER: Napa en sel zannimo ki pou manke; zot tou zot pou la, par per. SENYER ki'n konmann zot; son lespri ki'n rasanble zot.

¹⁷ In tir o sor pour zot; in partaz pei par son lanmen; zot ava pran posesyon pour touzour; zot pou viv la, zenerasyon apre zenerasyon.