Ezai 33 - Labib An Kreol Seselwa

Apel pour Demann Sekour

¹ Maler lo ou ki detri tou me ki pa'n ganny detri! Ki trai lezot me ki pa'n ganny trai! Ler ou ava'n fini detri, ou osi, ou pou ganny detri. Ler ou ava'n fini trai, ou pou ganny trai.

² SENYER! Pran pitye pour nou! Nou'n met nou konfyans dan ou. Ou ki nou lafors tou le bomaten, nou sover dan letan maler.

³ Tou bann pep i sove ler zot antann tapaz loraz. Bann nasyon i disperse ler ou leve dan ou mazeste.

⁴ Parey sotrel i antase pour devor plantasyon, lennmi pou sot lo zot e depouy zot larises.

⁵ SENYER i tre gran; son demer i lao dan lesyel. I ranpli Zerizalenm avek lazistis ek drwatir.

⁶ Ou lavenir, pou dan sekirite. Li menm ou delivrans, ou konnesans, ou lasazes. Respe pour SENYER, sanmenm trezor Siyon.

⁷ Ekoute! Bann brav pe kriye dan semen. Bann mesaze lape pe plere asodlarm.

⁸ Bann lari i dezer; napa personn lo semen. Lalyans in ganny kase. Serman in ganny meprize; son bann kondisyon pa'n ganny respekte.

⁹ Pei i an dey, i pe langir; Liban i ganny kouver avek laont, i pe deperi; Laplenn Saronn in vin parey en dezer; Bann pye dibwa lo montanny Basann ek Karmel in perdi zot fey.

Senyer I Averti Son bann Lennmi

¹⁰ SENYER i deklare: Aprezan mon pou azir, aprezan mon pou leve, mon pou montre mon grander.

¹¹ Zot in fer proze ki parey zerb sek; ler zot realiz li, i zis lapay. Ou prop souf pou detri ou parey dife.

¹² Bann pep pou ganny brile e vin parey laso. Dife pou detri zot parey brousay ki'n ganny koupe.

¹³ Zot ki lwen! Ekout sa ki mon'n fer. Zot ki pre! Rekonnet mon pwisans.

¹⁴ Dan Siyon, bann ki koupab i dan lafreyer. Bann ki napa respe pour Bondye pe tranble: Lekel parmi nou ki kapab reste obor en dife ki devore? Lekel parmi nou ki kapab reste pre avek laflanm eternel?

¹⁵ Sa ki mars drwat e ki dir laverite, ki refiz bann lavantaz ki i'n gannyen par lafors, ki refiz pran gous, ki bous son zorey pour li pa ekout proze kriminel e ki ferm son lizye pour li pa war mesanste.

¹⁶ Sa dimoun pou viv lo oter. I pou viv an sekirite dan kavern ros. Son dipen pou touzour la; son delo pou touzour la.

En Lavenir Briyan

¹⁷ Ou lizye ava admir lerwa dan son labote. Zot ava admir en pei dan tou son grander.

¹⁸ Ou pou mazin tou sa bann ki ti fer ou per: Oli sa enn ki ti kont larzan? Oli sa enn ki ti verifye taks? Oli sa enn ki ti enspekte bann fortifikasyon?

¹⁹ Ou pou nepli war bann arogan, sa pep ki koz en lalang ki ou pa kapab sezi, ki koz dan en lalang ki ou pa kapab konpran.

²⁰ Get lo kote Siyon, lavil kot nou fer lafet! Ou lizye ava war Zerizalenm, sa landrwa trankil; son latant pa pou zanmen ganny demonte; son bann pike pa pou zanmen ganny arase e okenn son bann lakord pa pou kase.

²¹ SENYER pou la avek nou dan son mazeste. En landrwa plen avek larivyer, gran koman pti, kot okenn navir pa traverse ni okenn gro bato pa pase.

²² SENYER i nou ziz; SENYER i nou sef; SENYER i nou lerwa; li menm ki pou sov nou.

²³ Bann lakord in las; zot nepli kapab tenir lema bato, ni gard lavwal sere. Alor, sa ta larises vole pou ganny partaze. Menm dimoun bwete pou pran par dan piyaz.

²⁴ Personn pa pou dir: Mon malad! Bann zabitan Zerizalenm pou ganny pardonnen zot pese.