Ezai 31 - Labib An Kreol Seselwa

Bondye Pou Protez Zerizalenm

¹ Maler pour sa bann ki desann Lezip pour rod led! Zot kont lo bann seval; zot met zot konfyans dan bann kales lager akoz i annan en kantite e dan bann kavalye, akoz zot tre for. Me zot pa lev lizye ver Bondye Sen Izrael ni konsilte SENYER!

² Pourtan, li i saz e i kapab anmenn maler. I pa sanz son parol; sa ki i dir sanmenm. I leve kont move dimoun e kont sa bann ki konplis dan lemal.

³ Bann Ezipsyen i bann imen, zot pa Bondye; zot bann seval i annan laser, zot pa en lespri. Ler SENYER i lev son lanmen, sa enn ki port sekour pou kilbite, sa enn ki ganny sekour pou tonbe e tou le de pou mor ansanm.

⁴ La sa ki SENYER ti dir mwan: Ler en lyon oubyen son piti i gronnyen pour gard sa zannimo ki i'n atrape; ler bann berze i vir kont li, i pa fatig li avek zot kriye, ni trakas li. La ki mannyer SENYER liniver pou desann, pour lager lo montanny Siyon e son kolin.

⁵ SENYER liniver pou protez Zerizalenm parey zwazo ki anvole par lao son bann piti. I pou protez li e delivre li; i pou eparny li, i pou sov li.

⁶ Pep Izrael! Retourn ver sa enn kont lekel ou'n komet en gran traizon.

⁷ Akoz sa zour, zot tou, zot pou debaras zot avek bann zidol annarzan e annor ki zot lanmen koupab in fabrike.

⁸ Alor, bann Asiriyen pou tonbe anba kou lepe ki pa sorti kot zonm. Lepe ki pou detri zot pa'n ganny fer par zonm. Zot ava sove devan sa lepe e son bann zennzan pou ganny met anba travoforse.

⁹ Son protekter pou sove dan lafreyer; son bann sef pou sove e abandonn zot paviyon. SENYER ki annan en laflanm dan Siyon en fournez dan Zerizalenm ki deklare.