Ezai 30 - Labib An Kreol Seselwa

En Lakor Initil avek Lezip

¹ La sa ki SENYER i deklare: Maler lo zot bann zanfan rebel! Zot fer bann plan ki pa sorti kot mwan. Zot siny bann lalyans ki mon pa aprouve e akimil pese enn lo lot.

² Zot deside pour desann Lezip san demann mwan konsey; zot al rod refiz anba proteksyon Faraon e rod en labri dan lonbraz Lezip.

³ Pour sa rezon, proteksyon Faraon pou vin en laont pour zot, e proteksyon anba lonbraz Lezip, zot limilyasyon.

⁴ Menm si son bann sef i deza dan lavil Soann e son bann mesaze in ariv Hanes,

⁵ laont pou tonm lo zot tou, akoz sa pep pa kapab fer nanryen pour zot. Zot pa pou ganny ni led ni lavantaz; me zis laont ek dezoner.

⁶ La en mesaz konsernan bann zannimo ki viv dan Negev: Atraver en pei kot i annan maler ek detres, la kot lyon, mal ek femel i reste, kot serpan ek dragon volan i reste, zot anmenn zot larises lo ledo bourik, zot trezor lo bos samo; kado pour en pep ki pa kapab fer nanryen pour ed zot!

⁷ Led sorti Lezip i san valer, i initil. Pour sa rezon mon'n apel sa pei: Rahab ki asiz nanryen fer.

En Pep Dezobeisan

⁸ Ale aprezan! Ekri sa devan zot lo en lafis; ekri li dan en liv, pour ki a lavenir, i ava reste koman en temwen pour touzour.

⁹ Annefe, sa pep i dezobeisan, en pep san okenn moral; zanfan i refize ekout lansennyman SENYER.

¹⁰ Zot dir avek bann vwayan: Aret ganny vizyon! E bann profet: Pa anons nou sa ki vre; dir nou keksoz ki gou, sa ki fer nou kontinyen reve.

¹¹ Aret swiv sa semen; sorti lo sa larout. Aret koz lo Bondye Sen dan Izrael avek nou.

¹² Alor, la sa ki Bondye Sen Izrael i deklare: Akoz ou rezet sa parol e met ou konfyans dan vyolans ek mansonz e ki ou kont lo zot, ki ou apiy lo la,

¹³ sa pese pou tonm lo ou, koman en lafant ki pou grandi dan en miray tre o, e pe al tonbe; i pou degrengole en sel kou.

¹⁴ Sa miray in ganny kraze san pitye parey potis later en potye; in ganny kase an pti morso; i pa bon pour pran labrez dan reso, ni pour al pran delo dan sitern.

¹⁵ La sa ki Senyer BONDYE, Bondye Sen Izrael i deklare: Ou delivrans i dan retour ver mwan e dan silans. Ou lafors i dan trankilite ek konfyans. Me ou'n refize.

¹⁶ Ou'n dir: Non! Nou pou sove lo seval. Alor, zot pou sove! Zot dir osi: Nou bann seval i rapid! Alor! Bann ki pourswiv zot pou osi rapid.

¹⁷ Anba menas en sel zonm, 1,000 pou sove. Anba senk zonm, zot tou zot pou sove ziska ler zot ava parey en ma lo montanny, parey en bannyer lo latet montanny.

¹⁸ Pourtan, SENYER pe espere pour li montre ou son labonte. I pou monte pou montre ou son konpasyon. Akoz SENYER i en Bondye zis. Byennere tou dimoun ki met lespwar dan li!

Bondye Pou Beni Son Pep

¹⁹ Zot, pep Siyon! Zot, bann zabitan Zerizalenm! Zot pou nepli plere. Koman ou kriy ver li, i pou sertennman montre ou son labonte. I pou antann ou, i pou reponn ou.

²⁰ SENYER pou donn ou dipen dan ladetres, delo dan maler. Ou Met ki ansenny ou pou la e ou pou war li avek ou prop lizye.

²¹ Ler ou pou al adrwat ou agos, ou pou antann en lavwa deryer ou: La semen; swiv li.

²² Alor, ou ava konsider koman enpir, larzan ki kouver ou bann stati; lor ki lo ou bann zidol an metal. Ou ava zet zot parey salte. Ou ava dir zot: Sorti la salte!

²³ Alor, i ava fer lapli tonbe lo bann lagrenn ki ou'n senmen e dible ki later ava prodwi ava dan labondans e bon kalite. Sa zour, troupo pou al manz zerb dan bann gran laplenn.

²⁴ Bann bef ek bann bourik ki kas later ava manz en zerb sale, ki'n ganny tale avek krok ek fours.

²⁵ Sa zour gran masak, bann tour pou tonbe, delo pou sorti lo montanny e lo oter tou bann kolin e pou koul annabondans.

²⁶ Sa zour SENYER pou met pansman lo blesir son pep, e geri son boubou. Lalin pou briye parey soley e lalimyer soley pou set fwa pli for, konmsi lalimyer pour set zour.

Asiri Pou Ganny Pini

²⁷ Gete! La SENYER pe vini. I sorti lwen. Son lakoler i en dife ki'n alimen; en gro lafimen ki monte. Son lalev i deborde avek lakoler e son lalang i parey en dife ki devor tou.

²⁸ Son souf i parey en larivyer ki pe deborde e monte ziska kot likou. I pas bann nasyon atraver en gran destriksyon e met dan lanmaswar lepep en labrid ki anmenn zot kot zot pa anvi ale.

²⁹ Zot pou selebre parey dan lafet sakre aswar. Zot leker pou kontan parey ler en dimoun i mars akonpannyen par lanmizik laflit, pour li al lo montanny SENYER, Ros Izrael.

³⁰ Alor, SENYER ava fer tande son lavwa pwisan. I pou montre lafors son lebra ki fer fraka ler i desann dan en dife ki devor tou avek son laflanm avek en tanpet lapli ek lagrel.

³¹ Bann Asiriyen pou tranble avek lafreyer ler zot ava antann lavwa SENYER, ler i pou konny zot avek son baton.

³² Sak kou ki SENYER pou donnen pou ganny akonpannyen par lanmizik pti tanbour avek laarp; i pou konbat kont zot.

³³ Sa dife in ganny prepare depi lontan; in ganny prepare pour lerwa. Dan en trou larz e profon, zot in met bokou dibwa an ron. Lalenn SENYER pou alim sa dife, konmsi souf ki pe brile.