Ezai 29 - Labib An Kreol Seselwa

Sor Zerizalenm

¹ Maler lo Ariel! Ariel, lavil ki David ti atake! Ou kapab selebre tou festival lannen apre lannen.

² Mon pou kraz ou Ariel. Ou pou konn zis plere ek lamante; ou ava pour mwan parey en lotel kot ou bril sakrifis.

³ Parey David, mon pou anserkle ou avek larme. Mon pou antour ou avek ou bann tour e konstri bann miray pou fer latak kont ou.

⁴ Alor, dan fon lo later, ou pou koze; ou bann parol pou sorti dan lapousyer; ou lavwa pou sorti anba later; ou parol pou monte sorti dan lapousyer.

⁵ Me sa kantite lennmi ki ou annan, pou parey lapousyer fen; sa kantite tiran diktater pou parey bren lapay dan divan. Alor, en sel kou,

⁶ SENYER liniver pou azir dan loraz, tranblemandter dan gro tapaz dan gro divan tanpet ek laflanm dife ki bril tou dan son pasaz.

⁷ Alor, tou sa bann nasyon ki fer lager kont Ariel, tou bann larme ki fer lager kont li ek son bann fortifikasyon, bann ki pa oule i egziste, tousala, pou disparet parey en rev, en vizyon dan lannwit.

⁸ Parey ler en dimoun lafen ki reve i pe manze, ler i leve e i ankor lafen; oubyen en dimoun swaf ki reve i pe bwar; kan i leve fatige, son lagorz i sek. I pou parey sa gran kantite nasyon ki fer lager kont montanny Siyon.

⁹ Reste etonnen! Pa dir nanryen! Gard lizye fermen! Pa war nanryen! Vin sou, me san bwar diven! Drive, san ki ou'n bwar labwason for!

¹⁰ Akoz SENYER in fer zot lespri angourdi; in ferm lizye bann profet, in met en vwal lo latet bann vizyoner.

¹¹ Pour ou, bann vizyon pou parey en dokiman ki'n sele. Si ou donn dimoun ki konn lir, e ou dir li: Lir sa! I pou dir i pa kapab, akoz sa dokiman in sele.

¹² Si ou donn sa dokiman en dimoun ki pa konn lir e ou dir li: Lir sa! I pou reponn: Mon pa konn lir.

¹³ La sa ki SENYER i deklare: Sa i parey ler sa pep i apros mwan avek son labous. I onor mwan avek zis son lalev, me son leker i lwen avek mwan; respe ki i annan pour mwan, i zis en komannman zonm ki i'n aprann.

¹⁴ Alor, mon pou kontinyen etonn sa pep avek ankor bann mervey; par bann aksyon etonan enn apre lot. Bann saz pa pou konpran. Lentelizans bann savan pa pou kapab eksplike.

¹⁵ Maler pour sa bann ki kasyet zot plan lwen avek SENYER! Ki fer proze dan fernwanr e ki dir: Lekel ki war nou? Lekel ki konn nou?

¹⁶ Me zot fer tou a lanver. Eski ou kapab konfonn en potye avek larzil? Eski sa lobze ki i'n fer i kapab dir li: Pa ou ki'n fer mwan? Oubyen sa po i kapab dir lo sa ki'n fer li: I napa lentelizans.

¹⁷ Eski dan en pti pe letan, Liban pa pou vin en plantasyon avek en kantite pye fri; plantasyon pye fri pou vin en lafore?

¹⁸ Sa zour, dimoun sourd pou antann parol ki'n ekri dan sa liv. Aveg pou sorti dan fernwanr e war kler.

¹⁹ Bann senp pou trouv en gran lazwa dan SENYER. Bann pov pou rezoui dan sa sel Bondye, sen dan Izrael,

²⁰ akoz bann diktater pou nepli egziste e bann dominer pou disparet. Tou bann ki pare pour fer sa ki mal pou ganny detri

²¹ Sa bann ki fer fos akizasyon, ki met en latrap pour bann ziz devan laport lavil e ki, san okenn rezon, fer en inosan ganny kondannen.

²² Pour sa rezon, la sa ki SENYER ki'n sov Abrahanm i dir avek desandan Zakob: Zanmen ankor, Zakob pou ganny imilye; zanmen ankor son figir pou sanz kouler.

²³ Akoz ler son bann zanfan ava war mervey ki mon lanmen in fer parmi zot, zot ava beni mon non; zot ava rekonnet ki mon non sakre i dan Izrael; zot ava respekte Bondye Izrael.

²⁴ Sa bann ki lespri in divage ava ganny disernman; sa bann ki kritike ava les zot ganny enstri.