Ezai 28 - Labib An Kreol Seselwa

Lavertisman lo Rwayonm Nor

¹ Maler lo bann soular dan pei Efraim, lavil dan laform en kouronn! I ganny byen dekore lo sa kolin ki domin son vale fertil. Me son labote i parey bann fler sek ki orn latet bann ki'n gonfle avek manze gra, ki'n soule avek diven.

² En zonm ki for e pwisan pe vini pour SENYER. I parey en lapli lagrel, en tanpet devastater; parey en gro tanpet ki fer larivyer deborde. Avek lafors son lanmen, i pou balans tou lo later.

³ Sa Lavil, kouronn ek lafyerte bann soular Efraim, pou ganny kraze anba lipye.

⁴ E sa fler sek ki ti ornman son labote ki lo latet sa enn ki gonfle avek manze gra, pou parey en fig mir avan sezon. Premye ki war li i sot lo li e manz li deswit.

⁵ Sa zour, SENYER liniver pou li menm sa zoli kouronn, en dyadenm pour leres son pep.

⁶ I pou enspir lazistis dan sa enn ki asiz pour rann zizman, en lafors pour sa bann ki repous lennmi devan laport lavil.

⁷ Bann pret ek bann profet osi in egare; soule avek diven; labwason for i fer zot drive; zot lespri in noye dan diven; zot perdi lekilib avek bann labwason for; zot pa war kler; zot rabase ler zot rann zizman.

⁸ Tou bann latab i kouver avek zot vomi degoutan; partou i annan salte.

⁹ I pou ansenny lekel? Lekel ki i pou fer konpran mesaz? Bann ki'n fek sevre? Bann ki'n fek kit tete zot manman?

¹⁰ I pe esey ansenny nou let par let, let par let. Laliny apre laliny, laliny apre laliny. En pe isi, en pe laba.

¹¹ Alor, i pou koz avek son pep, avek lalev ki pe tranble e dan en lalang etranze.

¹² I ti'n dir zot: La repo! Les sa ki fatige repoze. Isi i en landrwa trankil! Me zot pa'n oule ekoute.

¹³ Alor, SENYER pou ansenny laliny apre laliny, laliny apre laliny, en pe isi, en pe laba. Konmsa, zot ava marse, tonm par ledo e kas zot lezo; zot ava ganny atrape e ganny fer prizonnyen.

¹⁴ Alor! Bann ensolan ki domin sa pep ki reste Zerizalenm! Ekout parol SENYER.

¹⁵ Akoz zot in dir: Nou'n fer en lalyans avek lanmor; nou annan en lakor avek lemonn lanmor. Ler katastrof ava arive, i pa pou tonm lo nou; akoz nou'n fer mansonz vin nou labri e nou kasyet nou dan tou sa ki fo.

¹⁶ La sa ki Senyer BONDYE i deklare: La mon poz en ros fondasyon dan Siyon. En ros ki'n ganny byen swazir; en ros kwen presye, en fondasyon sir. Sa enn ki krwar dan li pa pou dezapwente.

¹⁷ Mon pou fer lalwa vin lareg, lazistis en filaplon. Lagrel pou balye zot lakaz mansonz e delo pou trenn zot labri.

¹⁸ Alor ou lalyans avek lanmor pou ganny annile e ou lakor avek bann ki dan lemonn lanmor pa pou tenir debout. Ler gran katastrof ava pase, i pou kraz ou.

¹⁹ Sak fwa ki i pou pase, i pou trenn ou; ler i pou pase, granmaten, lizour, lannwit, son mesaz pou ranpli ou avek lafreyer.

²⁰ Lili pou tro kourt pour ou alonz ou lo la; dra pou tro etrwat pour anvlop ou avek.

²¹ Akoz SENYER pou leve parey lo montanny Perazim, i pou pran lakoler parey dan vale Gabaon, pour li fer son travay, en drol kalite travay! E pour fini sa travay, en travay ekstraordiner!

²² Aprezan, aret gognarde, akoz ou lasenn pou ser ou plis ankor; akoz mon'n antann koz lo en lord destriksyon ki sorti kot Senyer BONDYE liniver.

²³ Ouver zot zorey! Ekout mon lavwa! Port atansyon! Ekout sa ki mon pou dir.

²⁴ Dimoun ki kas later pour li senmen, eski i pas letan zis kas later? Eski i pa zanmen fouy transe e kas later?

²⁵ O kontrer, ler in fini tal later, i senm legren, tras zepis, senm dible ek lorz dan zot plas e lezot sereal lo bor plantasyon?

²⁶ Son Bondye ki'n montre li koman fer sa travay e i swiv bann lenstriksyon.

²⁷ Personn pa kraz lagrenn dil avek masin; personn pa pas lo zepis avek larou saret; me ou servi en baton pour fer sa travay.

²⁸ Dible i ganny kraze pour fer dipen, me ou pa kontinyen tap bann zepi; ler ou diriz ou saret ki seval i trennen, ou pa kraz bann lagrenn.

²⁹ Sa metod travay, ou osi aprann avek SENYER liniver. Son konsey i merveye, i ranpli avek lasazes.