Ezai 27 - Labib An Kreol Seselwa

Laviktwar lo Leviatan

¹ Sa zour, avek son gran lepe byen fite, dir e pwisan, SENYER pou entervenir kont Leviatan, sa serpan ki anvole; Leviatan, sa serpan rize. I pou touy sa dragon ki reste dan lanmer.

² Sa zour, sant en sanson lo en zoli plantasyon rezen!

³ Mwan SENYER, ki gardyen sa plantasyon rezen. Mon aroz li toultan. Mon vey lo li lizour koman lannwit. Konmsa, personn pa kapab fer li ditor.

⁴ Mon nepli pran lakoler kont li. Me si i vin bann zarbis ki annan pikan, mon pou lager kont zot e mon pou bril zot,

⁵ amwen ki zot vin rod mon proteksyon, e fer lape avek mwan. Wi! Zot ava fer lape avek mwan.

⁶ Dan bann zour ki pe vini, Zakob pou pous rasin. Izrael ava donn bann bourzon, fleri e ranpli later antye avek son bann fri.

⁷ Eski SENYER in pini zot parey in pini sa bann ki ti viktimiz zot? Oubyen, eski i'n touy zot, parey sa bann ki ganny touye?

⁸ Ou'n egzekit ou zizman, ou'n anvoy zot annegzil. Par ou souf terib, ou'n balye zot parey en divan vyolan sorti dan Les.

⁹ Konmsa ki pese Zakob pou ganny efase. La rezilta pardon son pese: Tou bann ros ki ti servi pour fer bann lotel avek pou ganny kraze e vin koman lapousyer. Tou bann poto sakre, oubyen bann lotel lansan, pou disparet.

¹⁰ Napa personn dan bann lavil fortifye; zot in ganny abandonnen parey en dezer. Bann zenn bef i vin manz zerb, zot dormi la e zot plim bann bransaz.

¹¹ Ler bann brans i sek, zot ganny kase; bann fanm i vin met dife. Sa pep i san konpran. Pour sa rezon ki sa enn ki'n fer li, pou san pitye pour li; sa enn ki'n form li pa pou fer li okenn faver.

¹² Sa zour, SENYER pou bat bann zepi depi larivyer Efrat, ziska larivyer Lezip. I pou rasanble zot enn par enn, pep Izrael.

¹³ Sa zour, en gran tronpet pou ganny soufle. Alor, sa bann ki ti'n perdi dan pei Asiri e sa bann ki ti ganny anvoye annegzil Lezip pou retournen e ador SENYER lo montanny sen dan Zerizalenm.