Ezai 26 - Labib An Kreol Seselwa

Senyer Pou Donn Son Pep Laviktwar

¹ Sa zour, dan pei Zida, zot pou sante: Nou annan en lavil ki byen for. SENYER in antour li avek bann miray ek bann fortifikasyon.

² Ouver bann laport! Les antre sa nasyon drwat e fidel dan lafwa.

³ Avek en lespri ferm, ou gard zot dan lape, lape, akoz zot met zot konfyans dan ou.

⁴ Met ou konfyans dan SENYER pour touzour, akoz SENYER i sa Ros solid pour touzour.

⁵ In fer tonbe sa bann ki reste dan montanny; in kraz bann lavil ki byen proteze. In abes zot ziska dan lapousyer.

⁶ Bann pov, bann ki feb, pou kraz sa lavil anba zot lipye.

⁷ Semen lazistis i drwat. Ou ki zis! Fer drwat semen sa enn ki zis.

⁸ SENYER! Lo sa semen ki ou'n endike, nou met nou lespwar dan ou. Nou sel dezir, se loue ou non.

⁹ Pandan lannwit, mon rod ou avek tou mon leker. Mon lespri i rod ou avek en dezir profon. Akoz ler ou aplik zizman lo later, bann zabitan lemonn i aprann pratik lazistis.

¹⁰ Menm si ou annan pitye pour bann malfeter, zot pa aprann pratik lazistis. Dan pei kot lazistis i ganny pratike, zot azir an malonnet e zot pa war ou grander, SENYER.

¹¹ SENYER! Ou lanmen in leve, me zot pa war. Kan zot ava war sa gran pasyon ki ou annan pour ou pep, zot ava kanmi. Dife ki'n ganny alimen pour bann lennmi ava bril zot.

¹² SENYER! Ou'n akord nou lape, akoz vreman, tou sa ki nou'n fer, se ou ki'n fer pour nou.

¹³ SENYER nou Bondye! Apard ou, bokou sef in domin nou; me nou rekonnet zis ou koman SENYER.

¹⁴ Zot in mor, zot pa pou reviv, zot zis lonbraz e zot pa pou releve, akoz ou'n pini zot e ou'n detri zot; zot in ganny oubliye.

¹⁵ Me ou'n fer sa nasyon grandi, SENYER! Ou'n fer sa nasyon grandi; ou'n montre ou laglwar; ou'n agrandi bann teritwar pei.

¹⁶ SENYER! Zot ti rod ou ler zot ti dan detres. Zot ti priye ler ou ti pe pini zot.

¹⁷ SENYER! Nou ti prezan devan ou parey en fanm ki kriye dan douler lakousman.

¹⁸ Nou ti ansent, nou ti pe soufer en kantite; me nou ti met omonn zis divan. Nou pa'n ganny okenn laviktwar lo later; nou pa'n met omonn okenn zabitan.

¹⁹ Ou bann mor pou reviv, zot pou leve. Zot ki pe dormi dan lapousyer! Leve dan lazwa! Akoz ou laroze pou briye e later ava redonn lavi bann ki'n mor.

Zizman ek Restorasyon

²⁰ Ale mon pep! Antre dan ou lakaz e ferm laport deryer ou; al kasyet pour en pti moman. Les lakoler SENYER pase.

²¹ La SENYER pe sorti kot i ete pour li pini bann zabitan later pour zot bann forfe. Later ava les war disan ki'n koule; i pou nepli kasyet son bann viktim.