Ezai 25 - Labib An Kreol Seselwa

En Kantik Rekonesans

¹ SENYER! Ou mon Bondye. Mon pou loue ou e selebre ou non, akoz ou'n fer en kantite mervey pour mwan. Bann plan ki ou'n formen depi lontan i reste solid, zot pa sanze.

² Ou fer lavil vin en ta debri. Son bann fortifikasyon i anrin. Pale bann lennmi nepli; i pa pou zanmen ganny rekonstri.

³ Pour sa rezon, en pep pwisan pou glorifye ou; lavil bann nasyon kriyel pou annan respe pour ou.

⁴ Ou en landrwa refiz dimoun pov; ou'n vin en refiz pour bann ki dan bezwen e dan maler; en labri kont gro lapli e en lonbraz kont lasaler. Lakoler bann lennmi kriyel i fwete kont miray, parey lapli dan movetan.

⁵ Parey lonbraz en nyaz i fer bese lasaler, ou ti fer bann etranze aret fer tapaz e bann vyolan aret sant laviktwar.

Bondye I Prepar en Festen

⁶ Lo sa montanny, SENYER liniver pou donn en festen; pou annan en kantite bon manze; en festen bon diven ki'n ganny laz; en festen kot pou annan bon manze avek lanmwel, avek bon vye diven.

⁷ Lo sa montanny, i pou detri sa vwal dey ki pe kouver tou bann pep, sa dra ki'n kouver tou bann nasyon.

⁸ La sa ki SENYER i promet: Lanmor pou disparet pour touzour. Senyer BONDYE pou eswiy tou larm lo tou bann figir. I pou fer disparet laont son pep.

⁹ Sa zour, dimoun pou dir: Li menm li nou Bondye; nou'n esper li. In vin sov nou. Li menm SENYER ki nou ti pe espere. Annou selebre! Annou rezouir! I'n sov nou.

Bondye Pou Pini Moab

¹⁰ Lanmen SENYER pou reste lo sa montanny. Bann Moabit pou ganny kraze lanmenm an plas parey lapay ki ganny pil anba lipye dan en trou fimyen.

¹¹ Menm si zot ava lev zot lanmen la kot zot ete, parey en nazer i anvoy lanmen ler i naze, zot lorgey pou ganny abese.

¹² Zot bann gran miray fortifikasyon pou ganny demoli, kraze, e zet ater dan lapousyer.