Ezai 24 - Labib An Kreol Seselwa

Senyer Pou Pini Later

¹ SENYER pe al devaste later e kit li san zabitan. I pou boulvers later e fer fannen bann zabitan.

² Sa pou arive avek tou: Pret koman laik; met koman lesklav; bourzwa koman serviter; vander koman aster; sa ki prete koman preter; sa enn ki andete koman sa enn ki donn kredi.

³ Later pou ganny detri konpletman e depouye anba lao, akoz SENYER in koze.

⁴ Later pe sek e i pe tonm anrin; lemonn in delabre e pe tonm anrin; lesyel pe langir ansanm avek later.

⁵ Bann zabitan in polye later akoz zot in transgres bann lalwa e vyol bann regleman. Zot in kas bann lalyans ki ti devre reste pour touzour.

⁶ Pour sa rezon, later in ganny devore par malediksyon. Son bann zabitan pe soufer konsekans. Alor, zot diminyen lo later e i pa reste bokou dimoun.

⁷ Diven i an dey, plantasyon rezen pe deperi. Dimoun ki ti pe anmize in vin tris.

⁸ Bann zoli son tanbouren i nepli; tapaz lafet in fini; lanmizik zwaye lo laarp in arete.

⁹ Zot nepli bwar diven e sante; labwason for in vin anmer pour bann bwarer.

¹⁰ Lavil abandonnen in degrennen; tou lakaz in fermen, personn pa kapab antre.

¹¹ Dimoun i kriye dan semen; nepli annan diven; nepli annan lazwa; nepli annan lazwa lo later.

¹² Lavil i dan dezolasyon; bann laport in degrennen, e zot in tonm anrin.

¹³ La ki mannyer pei pou ete e ki pou arive parmi bann nasyon: I pou parey pye zoliv ki'n ganny plimen pandan letan rekolt, parey letan dernyen grap rezen in ganny rekolte.

¹⁴ Me zot, zot lev lavwa; zot sant avek lazwa; zot kriye avek lazwa. Dan Was, zot sant laglwar SENYER.

¹⁵ Zabitan dan rezyon Les! Rann glwar SENYER. Zot ki reste dan bann zil! Loue non SENYER, Bondye Izrael.

¹⁶ Bann ki sorti lwen pou sant louanz, e laglwar, an loner Bondye lazistis. Me mwan, mon dir ki mon'n perdi; mon'n perdi. Maler lo mwan! Bann tret in trai! Traizon! Wi! Bann tret in trai!

¹⁷ Zabitan later! Lafreyer, lafos ek bann latrap pe esper ou.

¹⁸ Sa enn ki esey sov laterer pou tonm dan lafos. Sa enn ki sorti dan lafos pou tonm dan latrap. Bann lafnet baraz lesyel in ouver e bann fondasyon later i tranble.

¹⁹ Later pe ouver partou; later pe fann, later i tranble avek vyolans.

²⁰ Later i drive parey en zonm sou. I balanse parey en kabann dan divan. I afese anba pwa son bann fot. I tonbe e i pou nepli kapab leve.

²¹ Sa zour, lao dan lesyel, SENYER pou pini larme lesyel e lo later, bann lerwa later.

²² Zot pou ganny atase ansanm parey prizonnyen dan en lafos; zot pou ganny anfermen dan en prizon e en bon pe letan apre, zot ava ganny pini.

²³ Apre sa, lalin pou vin rouz; soley pou kouver avek laont, akoz SENYER liniver pou rennyen lo montanny Siyon e dan Zerizalenm. Son mazeste pour ganny manifeste devan son bann ansyen.