Ezai 21 - Labib An Kreol Seselwa

Vizyon lo Lafen Babilonn

¹ En mesaz lo en Dezer Maritim! I pe vini parey en divan vyolan ki travers dezer Negev. I sorti dan dezer dan en pei terib.

² Mon'n ganny en vizyon terib: Tret i trai, destrikter i detri. Elanm! Monte e Med atake. Mon pe met en lafen avek tou bann soufrans.

³ Pour sa rezon ki mon leren i fer mal; douler in pran mwan parey douler lakousman. Mon tro dekouraze pour mwan tande. Mon tro per pour mwan gete.

⁴ Mon'n perdi larezon; mon tranble avek lafreyer. Mon ti esper lannwit vini me aprezan, i fer mwan per.

⁵ Zot prepar latab; santinel pe veye; zot manze, zot bwar. Leve bann zofisye! Gres zot boukliye!

⁶ Akoz, la sa ki SENYER ti dir mwan: Ale! Al plas en santinel; I ava anons sa ki i war.

⁷ I ava port latansyon, bokou latansyon, ler i war bann kavalye vini, par per, lo seval, lo bourik, lo samo.

⁸ Alor sa santinel ti kriye: SENYER! Mon debout tou lazournen; mon pe veye lo mon tour. Mon lo post pe veye tou lannwit.

⁹ Gete! La zot vini, de par de, lo seval! I ti reponn: Babilonn in tonbe! Babilonn in tonbe! Tou son bann zidol ki zot adore in fannen ater.

¹⁰ Ou mon pep ki'n ganny bate parey dible an plenner, mon'n fer anons zot sa ki mon'n tande, sorti kot SENYER liniver, Bondye Izrael.

En Mesaz pour Edonm

¹¹ Zot kriy mwan depi Seir: Santinel! Ki mannyer lannwit i ete? Santinel! Ki mannyer lannwit i ete?

¹² Santinel i reponn: Lizour pe fer, me lannwit pe vin ankor. Si oule poz ankor kestyon, poze; ou kapab retournen!

En Mesaz lo Arabi

¹³ La mesaz lo Arabi. Bann karavann ki sorti Dedann pou pas lannwit dan brousay Arabi.

¹⁴ Bann zabitan ava sorti Tema pour anmenn delo pour sa bann ki swaf e dipen pour bann refizye!

¹⁵ Zot in sove devan lager, devan lepe ki'n tire dan son fouro, devan fles ki'n redi e devan presyon lager.

¹⁶ Alor, la sa ki SENYER ti dir mwan: Dan en lannen, lannen en zouvriye, tou laglwar Kedar pou'n fini disparet.

¹⁷ Pa pou reste bokou solda ki tir fles dan larme Kedar. Akoz la sa ki SENYER, Bondye Izrael in deklare.