Ezai 19 - Labib An Kreol Seselwa

Bondye Pou Pini Lezip

¹ En mesaz konsernan Lezip: Gete! SENYER in mont lo en nyaz rapid. I pe vin Lezip. Bann zidol dan Lezip pou tranble devan li; bann Ezipsyen pou paralize e zot pou perdi kouraz.

² Mon pou fer bann Ezipsyen lager antre zot, vwazen kont vwazen, lavil kont lavil, rwayonm kont rwayonm.

³ Bann Ezipsyen pou perdi lespri e dekouraze. Mon pou met dezord dan zot plan. Zot pou konsilte bann zidol, bann mazisyen, bann sorsye ek bann deviner.

⁴ La sa ki Senyer BONDYE, SENYER liniver i deklare: Mon pou livre bann Ezipsyen dan lanmen en met kriyel, en lerwa feros ki pou renny lo zot.

⁵ Larivyer Nil pou sek; i pou vin konpletman sek.

⁶ Delo dan bann brans larivyer Nil pou diminyen e vin sek, zot pou ganny enfekte; zon ek zerb lanmar pou pouri.

⁷ Pou annan zis landrwa sek obor larivyer Nil, e obor son lanbousir. Tou sa ki'n ganny senmen obor Nil pou desese; zot pou ganny trennen dan divan e disparet.

⁸ Bann peser pou dan lapenn. Zot tou ki lapes avek lanmson pou lamante. Bann ki pas lasenn pou perdi kouraz.

⁹ Bann dimoun ki travay latwal e bann ki trikot lalenn pou dezespere. Zot telman enkyet ki zot figir i vin pal.

¹⁰ Bann ki trikot lalenn pou dan lafreyer; tou bann zouvriye pou dan latristes.

¹¹ Bann sef lavil Soann i vreman fou; Bann saz ki konsey Faraon i donn bann konsey bet. Koman eski ou kapab dir avek Faraon: Mon en garson sa bann saz en desandan bann ansyen lerwa?

¹² Aprezan, oli ou bann zonm saz? Fer zot dir ou e fer ou konnen ki plan SENYER liniver i annan kont Lezip.

¹³ Bann sef ki sorti Soann i'n vin fou, bann sef sorti Menmfis in perdi latet. Bann sef enportan dan zot tribi i'n anmenn Lezip lo move semen.

¹⁴ SENYER in met dan zot latet en lespri konfize ki fer Lezip bite dan tou sa ki i antreprann. In vin parey en soular ki drive dan son vomi.

¹⁵ Personn pa pou kapab fer keksoz pour Lezip: Ni latet, ni lake, ni brans palmye, ni zon.

¹⁶ Sa zour, bann Ezipsyen pou parey bann fanm: Zot pou tranble avek lafreyer devan lanmen ki SENYER liniver in leve kont zot.

¹⁷ Later Zida pou fer per bann Ezipsyen; tou dimoun ki pou antann nonm son non pou per akoz plan ki SENYER liniver in monte kont zot.

¹⁸ Sa zour, pou annan senk lavil dan pei Lezip ki pou konn koz langaz Kanaan e fer serman lo non SENYER liniver. Enn sa bann lavil pou ganny apele Lavil Soley.

¹⁹ Sa zour, pou annan en lotel pour SENYER dan milye pei Lezip e en kolonn pour SENYER lo son frontyer.

²⁰ Sa i pou en siny e en temwannyaz anver SENYER liniver dan pei Lezip. Ler zot ava kriy ver SENYER akoz lopreser, i pou anvoy zot en sover, i pou defann zot e delivre zot.

²¹ SENYER ava fer bann Ezipsyen konn li, e sa zour, zot ava konn SENYER. Zot ava ador li e ofer li bann sakrifis e bann sakrifis konplet; zot ava gard bann ve ki zot ava fer anver SENYER.

²² SENYER pou pini Lezip. I pou pini li, me i pou geri li e bann Ezipsyen ava retourn ver SENYER ki ava ekout zot siplikasyon e geri zot.

²³ Sa zour, pou annan en larout ki pou relye Lezip avek Asiri. Bann Asiriyen pou vin Lezip e bann Ezipsyen pou al Asiri. Bann Ezipsyen pou ador avek bann Asiriyen.

²⁴ Sa zour, Izrael pou vin trwazyenm avek Lezip ek Asiri ki pou vin en benediksyon pour later

²⁵ ki SENYER liniver pou beni ler i dir: Lezip mon pep, Asiri ki mon'n kree e Izrael mon posesyon ava ganny beni.