Ezai 18 - Labib An Kreol Seselwa

Bondye Pou Pini Letyopi

¹ Maler lo sa pei! Pei ki annan bato de lavwal, ki tou dilon larivyer Kous

² e ki anvoy bann anbasader par larivyer Nil, dan bann bato fer avek papiris. Ale! Zot bann mesaze rapid. Al kot en nasyon ki gran e ki annan lapo listre; kot en pep ki tou dimoun i per partou dan lemonn; kot en nasyon pwisan ki ganny laviktwar lo son lennmi; dan en pei ki ganny separe par larivyer.

³ Zot tou, bann zabitan lemonn, zot ki reste lo later! Ler en siny i ganny plase lo montanny, get byen! Ler tronpet i soufle, ekoute!

⁴ Annefe, la sa ki SENYER in dir mwan: Mon pou reste trankil e depi kot mon reste, mon pou gete parey gro larder soley dan lazournen, parey en nyaz laroze dan lasaler pandan letan rekolt.

⁵ Akoz avan letan rekolt, ler bann fler in fini fleri, ler fler in vin grap ki pe mir, i pou koup bann bourzon initil avek en zouti; i pou tay bann brans ki pe file partou.

⁶ Zot tou pou ganny abandonnen avek bann zwazo rapas ki dan montanny ek bann zannimo sovaz ki lo later. Bann zwazo rapas ava manz zot pandan lete, bann zannimo sovaz ava ganny manze pandan liver.

⁷ Alor, dan sa letan, SENYER liniver pou ganny bann kado sorti kot sa pep ki gran e ki zot lapo i listre; en pep ki tou bann nasyon i per; en nasyon pwisan ki ganny laviktwar lo son lennmi; ki viv dan en pei ki ganny separe par larivyer. I pou anmenn bann kado ziska Montanny Siyon, kot SENYER liniver i ete.