Ezai 17 - Labib An Kreol Seselwa

Bondye Pou Pini Asiri ek Izrael

¹ Mesaz konsernan Damas. Damas pou nepli en lavil; i pou vin zis en ta debri.

² Son bann lavil in ganny abandonnen pour touzour. Zot ava bann landrwa kot troupo ava vin repoze, e personn pa pou fer zot per.

³ Tou bann miray proteksyon otour Efraim pou ganny detri. Damas pou nepli en rwayonm e bann restan Siriyen pou pas parey laglwar bann zanfan Izrael. SENYER liniver ki deklare.

⁴ Sa zour, Izrael pou perdi son pwa e i pou deperi.

⁵ Izrael pou parey apre rekolt ler bann zepi dible in ganny met an ta, ler tou rekolt i ganny ranmase dan Vale Refaim.

⁶ Pa pou reste bokou keksoz dan Izrael. Sa pei pou parey en pye zoliv apre rekolt, ler in ganny sekwe pour ranmas son fri e i reste anler dan leker apre rekolt, detrwa fri e dan brans ki pli gran, ankor detrwa dan bann bout brans. SENYER Bondye Izrael ki deklare.

⁷ Sa zour, lepep pou tourn son regar ver son Kreater e zot lizye pou war Bondye Sen Izrael.

⁸ Zot pou nepli pran kont bann lotel ki travay zot prop lanmen; ni sa ki zot in fabrike avek zot ledwa. Zot pou nepli annan lentere pour bann poto sakre Asera ni bann lotel lansan.

⁹ Sa zour, son bann lavil fortifye pou ganny abandonnen, parey bann lavil bann Hivit ek bann Amorit ti ganny abandonnen otrefwa, ler bann Izraelit ti vini. Tou pou ganny devaste.

¹⁰ Izrael! Ou'n oubliy Bondye ki sov ou. Ou'n oubliy ou Ros ki protez ou. Alor, ou'n plant bann zoli pye dibwa pour ou san dout ador en bondye etranze.

¹¹ Sa menm zour ki ou ti plant zot, ou ti war zot pouse, e son lannmen bomaten, i ti fleri. Ou pa pou ganny okenn rekolt, akoz napa okenn remed pour son maladi.

Lennmi I Ganny Bate

¹² Maler! Tapaz en gran kantite dimoun i parey loraz. Tapaz ki zot fer i parey ronfleman lanmer.

¹³ Bann nasyon i gronnyen parey bann gro laroul. Me SENYER pou rezet zot, e zot ava sov byen lwen. Zot ganny pouse parey lapay dan divan lo montanny, parey en tourbiyon lapousyer avan tanpet.

¹⁴ Aswar, i annan en lafreyer terib. Avan bomaten, tou in disparet. Lala sa ki arive avek sa bann ki depouy nou; sanmenm sor sa bann ki vol tou nou posesyon.