Ezai 16 - Labib An Kreol Seselwa

Moab I dan Dezespwar

¹ Anvoy mouton kot dirizan sa pei depi Sela, an pasan par dezer, ver montanny Siyon.

² Bann fiy Moab pe espere lo bor larivyer Arnon kot i sek. Zot parey bann zwazo ki pe anvole partou akoz zot in ganny pouse dan zot nik.

³ Annou diskit ansanm pour pran en desizyon. Fer midi vin lannwit; protez nou avek ou lonbraz. Kasyet bann refizye, pa denons sa ki pe sove.

⁴ Les bann refizye ki sorti Moab vin reste kot ou! Donn zot labri kot ou. Protez zot kont sa destrikter. Zour bann devastasyon ava'n arete, e ki bann destriksyon ava'n fini, bann diktater ava'n disparet dan pei.

⁵ Alor, par ou fidelite, en tronn pou ganny etabli. Parmi desandan David, en dirizan pou leve ki pou gouvern avek lazistis e avek ladrwatir.

⁶ Nou'n antann koz lo lorgey Moab, son lorgey ekstrenm, son larogans, son lorgey ek son lensolans; me tousala i vid.

⁷ Aprezan, zabitan Moab i kapab lamante; zot tou, zot kapab plere. Kriye, lamante, pour bann pake rezen sorti Kir-Hareset.

⁸ Annefe, bann plantasyon Hesbonn in fletri; plantasyon rezen Sibma osi. Dirizan bann nasyon in kraz sa bann plan rezen ki ti pouse ziska Yazer e dan bordir dezer; son bann bourzon ti file ziska lot kote lanmer.

⁹ Pour sa rezon, mon plere avek bann zabitan Yazer, pour plantasyon rezen Sibma. Hesbonn! Eleale! Mon larm i koule pour ou akoz nou nepli antann sante dan letan rekolt rezen e rekolt dible.

¹⁰ Lazwa ek kontantman in disparet dan bann vale. Napa okenn sanson ki sorti dan plantasyon rezen, personn pa kriye avek kontantman. Personn pa vin kraz rezen pour fer diven; nepli antann okenn sanson avek lakadans.

¹¹ Alor, konmsi en laarp anndan mwan pe plennyen lo Moab, mon leker i plere pour Kir Eres.

¹² Lepep Moab pe fatig li ler i al lo montanny sakre, ler i antre dan son sanktyer pour priye. Tousala pa pou servi nanryen.

¹³ Sa i parol ki SENYER ti deklare konsernan Moab depi lontan.

¹⁴ Me aprezan, SENYER i deklare: Dan 3 an, parey letan ki en travayer i ganny anploye, laglwar Moab pou diminyen malgre son gran popilasyon. Leres bann sirvivan pou vin nanryen ditou e san okenn lenportans.