Ezai 15 - Labib An Kreol Seselwa

Bondye pou Detri Moab

¹ La mesaz lo Moab: Dan en lannwit, Ar-Moab ti ganny detri; i ti ganny plonze dan silans. Dan en lannwit, Kir-Moab ti ganny detri; i ti ganny plonze dan silans.

² Zabitan Bayit ek Dibonn in monte dan bann landrwa sakre pour plere. Zot pe lamante lo Nebo ek Medba. Moab pe plennyen. Zot tou, zot in raz zot latet; zot tou, zot in koup zot labarb.

³ Zot lo semen dan lenz dey. Lo twa bann lakaz e dan bann plas piblik, tou dimoun i an larm, pe plere.

⁴ Zabitan Hesbonn ek Eleale pe kriye. Ou antann zot lavwa ziska Yahatz. Pour sa rezon, bann solda Moab pe kriye; zot in dekouraze.

⁵ Mon leker pe lamante pour Moab. Son bann zabitan pe sove ziska Soar e ziska Eglat-Selisya. Dan monte Louit zot pe plere. Zot pous en kri dezespwar lo semen ki al Horonaim.

⁶ Delo Nimrim in sek, zerb in brile, gazon nepli pouse, nepli annan okenn verdir.

⁷ Alor, sa ki zot ti annan ki'n reste, zot anmenn avek zot pli lwen lo lot kote larivyer bann pye sol.

⁸ Tou teritwar Moab i rezonnen avek lapel osekour. Sa bann lamantasyon i ariv ziska Eglaim; i ganny tande ziska Beer-Elim.

⁹ Larivyer Dibonn i ranpli ek disan. Me plis maler pou ariv lo dimoun: En lyon pou atak bann sirvivan Moab ek bann ki'n reste deryer dan pei.