Ezai 14 - Labib An Kreol Seselwa

Retour Pep Izrael Sorti Annegzil

¹ Me SENYER pou pran konpasyon pour Zakob e swazir Izrael ankor; i pou fer li viv anpe lo son prop later. Bann etranze ava zwenn avek li pour form parti desandan Zakob.

² Lezot pep etranze ava akey Izrael, pour anmenn li dan son pei. La, lo later ki pou SENYER, pep Izrael pou fer zot vin son lesklav, zonm koman fanm. Izrael pou fer prizonnyen sa bann menm dimoun ki ti'n anmenn li an kaptivite; i pou domin sa bann ki ti kraz li.

Lerwa Babilonn dan Lemonn Lanmor

³ Zour ki SENYER ava'n donn ou repo apre bann letan douler ek tourman e apre bann letan lesklavaz ki ou ti pas ladan,

⁴ ou ava sant sa sanson lo lerwa Babilonn: Ki'n arive avek sa diktater? Son larogans in disparet? I nepli kapab ensilte?

⁵ SENYER in kas baton bann move dimoun. In kas baton pouvwar bann diktater

⁶ ki ti bat bann pep avek vyolans e san pitye; ki ti domin zot avek lakoler e persekit zot kontinyelman.

⁷ Aprezan, later antye i dan lape ek latrankilite; dimoun pe sant dan lazwa.

⁸ Menm bann pye dibwa i dan lazwa akoz ou, bann pye sed Liban i sante: Depi ki ou'n ganny zet ater, personn pa vin koup nou.

⁹ Lemonn lanmor i la pour akey ou ler ou vini. Dan lemonn lanmor, bann mor pe leve pour akey ou; pour akey tou bann dirizan lo later. I fer leve lo zot tronn tou lerwa bann nasyon.

¹⁰ Zot tou, zot pou koze. Zot pou dir: Ou osi, ou'n perdi tou ou lafors! Aprezan, ou'n vin parey nou.

¹¹ Ou lantouraz in desann dan lemonn lanmor, akonpannyen avek lanmizik laarp. Ou pou dormi dan lapouritir. Ou pou kouver avek lever.

¹² Ki'n arive! Ou'n tonbe sorti dan lesyel! Ou, sa zetwal klate, garson loror, ou'n ganny zet ater, ou ki ti abes bann nasyon!

¹³ Ou ti dir dan ou leker: Mon pou mont dan lesyel; Mon pou met mon tronn par lao bann zetwal Bondye. Mon pou enstal mwan lo montanny lasanble Bondye.

¹⁴ Mon pou mont lo latet nyaz; mon pou vin parey Bondye Treo.

¹⁵ Me o kontrer, ou'n ganny zet anba dan lemonn lanmor, dan fon en gran lafos.

¹⁶ Bann dimoun ki war ou, pou fikse zot regar avek etonnman. Dan zot menm, zot demande: Li menm li sa zonm ki ti fer later tranble, ki ti sekwe bann rwayonm?

¹⁷ Li menm ki'n fer lemonn vin en dezer, e ki'n kraz bann lavil? Li menm ki ti refize larg bann prizonnyen?

¹⁸ Tou bann lerwa bann nasyon pe repoz avek loner, sakenn dan son prop latonm.

¹⁹ Me ou, ou'n ganny zete deor ou latonm. Ou parey en zanfan ki'n mor an nesan. Ou parey bann lekor mor ki'n ganny perse avek lepe e ki'n ganny zete lo ros dan trou, parey en kadav ki'n ganny kraze anba lipye.

²⁰ Me ou pa pou ganny antere avek zot, akoz ou'n detri ou pei, ou'n detri ou pep. Laras bann kriminel pou ganny oubliye pour touzour!

²¹ Prepar masak bann zanfan akoz krim zot papa. Zot pa pou lev ankor pour al anvai lemonn, oubyen konstri lavil partou lo later.

Babilonn Pou Ganny Detri

²² La sa ki SENYER liniver i deklare: Mon pou leve kont zot; mon pou fer disparet sa non Babilonn, son bann zabitan ki'n reste vivan, son bann zanfan e tou zot bann desandan apre zot.

²³ La sa ki SENYER liniver i deklare: Mon pou fer sa lavil vin en lanmar en landrwa pour tang reste. Mon pou detri li avek en balye destriksyon.

Bondye Pou Detri bann Asiriyen

²⁴ SENYER liniver in fer en serman: Tou pou arive parey mon'n predir; tou pou arive parey mon'n deside.

²⁵ Mon pou detri bann Asiriyen dan mon pei; lo mon bann montanny, mon pou kraz li anba mon lipye; mon pou tir sa fardo ki zot in met lo mon pep e mon pou tir sa pwa ki lo zepol mon pep.

²⁶ Sanmenm sa plan ki'n ganny prepare pour later antye. Sanmenm sa lanmen ki'n leve kont tou nasyon.

²⁷ SENYER liniver ki'n form sa proze. Lekel ki kapab fer li sanz sa? In lev son lanmen. Lekel ki kapab sanz sa?

Bondye pou Detri bann Filisten

²⁸ La mesaz ki ti ganny delivre dan lannen ki lerwa Akaz ti mor:

²⁹ Bann Filisten pa bezwen rezoui, akoz sa baton ki pe tap lo zot in ganny kase. Annefe, en viper pou sorti dan kadav en serpan, dan sa viper pou sorti en dragon volan.

³⁰ Lene zanfan ki sorti dan bann fanmir pov ava ganny dekwa manze; bann malere ava dormi anpe. Me ou lennmi pou fer ou mor lafen e mon pou touy sa bann ki ava ankor vivan.

³¹ Bann laport lavil! Plere! Bann lavil! Kriye! Tou bann Filisten i fonn avek lafreyer, akoz en gro lafimen pe monte sorti dan Nor; personn pa pe sove parmi bann konbatan.

³² Ki larepons fodre donn mesaze bann nasyon? SENYER in etabli Siyon. Bann malere parmi son pep i an sekirite kot li.