Ezai 13 - Labib An Kreol Seselwa

Bondye Pou Pini Babilonn

¹ La mesaz ki Ezai, garson Amoz, ti gannyen dan en vizyon:

² Lev en bannyer lo latet en montanny dezer. Kriy byen for; fer siny avek zot lanmen pour zot antre par laport bann gran dimoun.

³ Mwan menm ki'n donn lord bann zonm ki mon'n konsakre. Mon'n rasanble mon bann brav gerye, ki selebre mon laviktwar e egzekit mon lakoler.

⁴ Ekout sa tapaz ki sorti dan montanny! I parey en gran lafoul. Ekout sa soulevman bann rwayonm, bann nasyon ki'n rasanble! Sa SENYER liniver ki pe enspekte son bann troup avan konba.

⁵ Zot sorti dan en pei byen lwen, dan lot bout lesyel. SENYER ek bann zarm son lakoler ki pou detri later antye.

⁶ Lamante! Akoz zour SENYER i pros. I pe vini parey en dezas ki'n ganny anvoye par Bondye pwisan.

⁷ Pour sa rezon, tou lebra pou tonbe, tou dimoun pou tonm dan dekourazman.

⁸ Dimoun pou per. Soufrans atros pou anvai zot. Zot pou ganny douler parey en fanm dan lakousman. Efare, zot pou get kanmarad avek etonnman. Zot figir pou vin rouz.

⁹ Sa zour SENYER pe vini, en zour terib, deborde avek gran lakoler. En zour ki i pou fer later vin en landrwa devaste e ekstermin tou sa bann ki fer pese.

¹⁰ Annefe, bann zetwal ek zot bann konstelasyon pa pou donn okenn lalimyer. Soley leve pou sonm e lalin pa pou donn son laklerte.

¹¹ Mon pou pini lemonn pour son mesanste e bann move dimoun pour zot krim. Mon pou met en lafen avek dimoun ki arogan. Mon pou tenny lorgey bann diktater.

¹² Zonm ava vin pli rar ki lor pir. Bann imen ava vin pli rar ki lor sorti Ofir.

¹³ Alor, mon pou fer lesyel tranble. Later pou ganny sekwe lo son fondasyon devan lakoler SENYER liniver, dan sa zour terib.

¹⁴ Alor, parey en gazel ki pe ganny pourswiv, oubyen, parey troupo mouton san personn pour rasanble zot, zot pou retourn kot zot prop pep; sakenn pou sov dan son pei.

¹⁵ Bann ki ganny atrape pou ganny transperse; bann ki ganny arete pou ganny masakre.

¹⁶ Zot bann zanfan pou ganny kraze devan zot, zot lakaz pou ganny sakaze e zot bann fanm pou ganny vyole.

¹⁷ Mon pe eksit bann Med kont zot. Larzan napa valer pour zot e lor pa nanryen pour zot.

¹⁸ Zot pou zet ater bann zennzan avek zot dart; zot pou san pitye anver bann ti baba; zot pou kriyel anver bann zanfan.

¹⁹ Babilonn! Sa pli zoli lavil dan rwayonm, lafyerte bann Babilonyen, pou vin parey Sodonm ek Gomor zour Bondye ti detri zot.

²⁰ Zanmen personn pou vin reste la; i pou reste san zabitan pour touzour. Bann nomad pa pou vin dres zot latant ankor, ni bann berze pa pou anmenn zot troupo.

²¹ Zannimo sovaz ki pou reste la; bann lakaz pou ranpli avek ibou; bann lotris pou vin reste la e bann bouk pou donn bal ladan.

²² Ou pou antann irlman bann yenn dan bann tour, bann sakal dan bann pale. Sa letan i pros, i pe vini, son bann zour in fini, son lafen pa lwen.