Ezai 12 - Labib An Kreol Seselwa

Louanz ek Remersiman

¹ Sa zour, ou pou dir: Mon loue ou, SENYER! Menm si ou ti ankoler avek mwan. Ou ti ankoler avek mwan, me aprezan, ou lakoler in tonbe e ou konsol mwan.

² Bondye i mon sover. Mon pou fer li konfyans, mon pa pou per, akoz Senyer BONDYE i mon lafors e mon pwisans. Li menm ki sov mwan.

³ Avek lazwa, ou pou tir delo dan bann sours lavi.

⁴ Sa zour, ou pou dir: Loue SENYER, envok son non. Fer bann nasyon konnen tou bann mervey ki i'n fer.

⁵ Sante devan SENYER akoz in fer gran mervey. Anons tousala lo later antye.

⁶ Zabitan Siyon kriy byen for! Sant zot lazwa, akoz Bondye sen Izrael i gran parmi zot.