Ezai 11 - Labib An Kreol Seselwa

En Rwayonm Anpe

¹ En bourzon ava sorti dan tron Zese, en brans ava sorti dan son rasin.

² Lespri SENYER pou repoz lo li, lespri lasazes ek lentelizans, lespri konsey ek lafors, lespri konnesans ek respe pour SENYER.

³ I pou pran plezir pour respekte SENYER. I pa pou ziz dapre sa ki son lizye i war oubyen deside dapre sa ki son zorey i tande.

⁴ I pou ziz bann pov dapre lazistis e desid avek ladrwatir, an faver bann ki san defans lo later. Lo son lord, zabitan later pou ganny pini. I pou detri bann move dimoun avek son souf.

⁵ Lazistis ava en sang otour son leren; fidelite ava parey en sentir otour son laans.

⁶ Loulou pou viv avek mouton, leopar pou dormi obor kabri. Pti bef pou manz ansanm avek lyon e en pti zanfan ava diriz zot.

⁷ Bef ek lours pou manz dan menm laplenn; zot bann piti pou dormi obor kanmarad; lyon pou manz zerb sek parey bef.

⁸ Pti baba pou zwe obor trou serpan. Pti zanfan pou met son lanmen dan trou viper.

⁹ Pou nepli annan nanryen ki fer dimal lo mon montanny sen; parey delo sale i ranpli losean, konnesans SENYER pou ranpli later.

Bann Egzile Pou Retournen

¹⁰ Sa zour, desandan Zese pou debout koman en bannyer pour tou bann zabitan later; bann nasyon pou vin kot li e son demer pou ranpli avek son prezans.

¹¹ Sa zour, SENYER pou lev son lanmen ankor en fwa pour li liber restan son pep; bann ki ti Asiri, Lezip, Patros, Kous, bann ki dan Elanm, Sinear, Hamat e bann ki reste lo bann zil lanmer.

¹² I pou lev en bannyer pour bann nasyon, reinir bann ki dan Izrael e rasanble pep Zida disperse dan kat kwen later.

¹³ Efraim pou nepli zalou, bann lennmi Zida pou ganny detri. Efraim pou nepli zalou Zida e Zida pou nepli lennmi Izrael.

¹⁴ Ansanm, zot pou atak bann Filisten dan Was. Ansanm, zot pou depouy bann zabitan dan Les. Edonm ek Moab pou tonm dan zot lanmen e bann Amonit pou anba zot dominasyon.

¹⁵ SENYER pou detri konpletman labe ki dan lanmer Lezip; i pou balans son lanmen lo larivyer Efrat; avek son souf pwisan, i pou diviz li an set kot dimoun ava kapab travers apye.

¹⁶ Pou annan en larout sorti Asiri pour restan son pep ki pou ankor laba, parey ti annan enn pour Izrael ler i ti sorti Lezip.