Ester 8 - Labib An Kreol Seselwa

Lalwa an Faver bann Zwif

¹ Sa menm zour, lerwa Zerzes ti donn larenn Ester lakaz Haman, sa lennmi bann Zwif. Mardose ti prezant li devan lerwa, akoz Ester ti'n dir lerwa ki i ete pour li.

² Lerwa ti tir son bag avek stanp ki i ti'n repran avek Haman e donn Mardose. Lo son kote, Ester ti met Mardose responsab bann byen Haman.

³ Apre, Ester ti koz ankor avek lerwa. I ti tonm devan li an pleran, e sipliy li pour anpes sa proze ki Haman, sa Agagit ti'n fer kont bann Zwif.

⁴ Lerwa ti prezant Ester son baton annor,

⁵ e Ester ti leve e debout devan lerwa. I ti dir, “Si mon ganny faver lerwa, si i fer plezir lerwa e si lerwa i trouve ki sa i byen, mon demande ki en lord i ganny ekri pour anil bann let ki'n ganny ekri par Haman, garson Hamedata en desandan Agag, pour fer masakre bann Zwif ki viv dan tou bann provens lerwa.

⁶ Koman mon kapab siporte ki en tel maler i tonm lo mon pep? Ki mannyer mon kapab war destriksyon mon fanmir?”

⁷ Lerwa Zerzes ti dir larenn Ester ek Zwif Mardose, “Mon'n donn Ester lakaz Haman e zot in pann li lo lesafo akoz i ti oule fer ditor bann Zwif.

⁸ Aprezan, o non lerwa, ou kapab ekri sa ki ou oule konsernan bann Zwif, e sel li avek sele rwayal, akoz en lalwa ekri lo non lerwa e sele avek son stanp, pa kapab ganny anile.”

⁹ Sa menm zour, venntrwazyenm zour dan trwazyenm mwan ki mwan Sivan, bann sekreter lerwa ti ganny konvoke. En lalwa ti ganny ekri lo tou sa ki Mardose ti dir konsernan bann Zwif, e adrese avek bann reprezantan lerwa, bann gouverner ek bann fonksyonner enportan dan tou bann provens, depi Lenn ziska Letyopi; 127 provens an tou, sak provens dapre son prop lekritir e sak pep dan son prop langaz e pour tou bann Zwif osi, dapre zot prop lekritir e zot prop langaz.

¹⁰ Bann let ti ganny ekri lo non lerwa Zerzes e sele avek stanp lerwa. Sa bann let ti ganny ekspedye par bann mesaze lo seval deras ki ti ganny sonnyen dan lekiri rwayal.

¹¹ Par sa bann let, lerwa ti otoriz bann Zwif dan tou bann lavil pour rasanble e defann zot lavi pour detri, touye, e pour ekstermin nenport troup larme lepep, oubyen larme bann provens ki persekit zot avek zot fanm ek zot fanmir. Zot ti annan osi drwa fer piyaz zot bann byen

¹² pandan en sel zour. Sa ti ariv trezyenm zour, dan douzyenm mwan, ki mwan Adar, dan tou bann provens lerwa Zerzes.

¹³ En kopi sa let ti ganny pibliye koman en lalwa dan sak provens e ganny anonse avek lepep, e bann Zwif ti pare sa zour, pour revanz zot bann lennmi.

¹⁴ Alor, bann mesaze, lo bann seval deras ki ganny swannyen dan lekiri lerwa, ti depese lo lord lerwa. Sa lalwa ti ganny kominike dan lavil kapital Siz.

¹⁵ Mardose ti sorti devan lerwa abiye dan labi rwayal kouler ble e blan avek en gro kouronn annor, en gran manto an linenn fen, kouler rouz fonse. Dan lavil Siz, ti annan tapaz ek selebrasyon.

¹⁶ Bann Zwif ti dan lazwa, kontantman ranpli avek bokou loner.

¹⁷ Dan sak provens e dan sak lavil, partou kot lord ek lalwa lerwa ti arive, bann Zwif ti dan lazwa; ti en zour lafet. Bokou parmi lepep dan pei ti deklar zot Zwif, akoz zot ti'n per bann Zwif.