Ester 6 - Labib An Kreol Seselwa

Haman I Oblize Fer Loner Mardose

¹ Sa swar, lerwa pa ti ganny sonmey. I ti donn lord pou anmenn Liv Listwar rwayonm ki ti ganny lir devan li.

² Zot ti lir kot i rakonte koman Mardose ti koz lo size Bigtan ek Teres, sa de enik ki ti gardyen laport e ki ti'n fer konplo pour touy lerwa.

³ Lerwa ti demande, “Ki promosyon oubyen distenksyon Mardose ti gannyen pour sa?” Bann enik ti reponn, “Nanryen pa'n ganny fer pour li.”

⁴ Lerwa ti demande, “Lekel fonksyonner ki dan lakour?” Haman ti'n fek antre dan lakour eksteryer pale lerwa pour demann lerwa fer pann Mardose lo sa lesafo ki i ti'n prepare pour li.

⁵ Bann enik ti dir, “Haman ki dan lakour.” Lerwa ti dir, “Fer li antre.”

⁶ Haman ti antre, e lerwa ti demann li, “Ki devre fer pour sa enn ki lerwa i anvi onore?” Haman ti dir dan li menm: Lekel sa enn ki lerwa i anvi fer loner plis ki mwan?

⁷ Alor, Haman ti dir lerwa, “Pour en zonm ki lerwa i dezire onore,

⁸ fodre anmenn labi rwayal ki lerwa i mete, en seval ki lerwa i monte, avek en kouronn rwayal lo son latet.

⁹ Donn sa labi rwayal ek sa seval avek enn bann pli gran fonksyonner parmi bann nob. Fer li abiy sa zonm ki lerwa i oule onore e ki i anmenn li lo seval ziska laplas piblik dan lavil e proklanm devan li: La ki mannyer lerwa i tret sa enn ki i dezire onore.”

¹⁰ Alor, lerwa ti dir Haman, “Depese, pran sa bann vetman ek sa seval; al fer parey ou'n dir, anver sa Zwif, Mardose, ki asiz dan lantre pale rwayal. Pa mank okenn detay ki ou'n mansyonnen.”

¹¹ Alor, Haman ti pran sa vetman ek sa seval, abiy Mardose, e fer li travers laplas piblik dan lavil e proklanmen: La sa ki fodre fer pour sa zonm ki lerwa i annan gran plezir fer loner.

¹² Apre, Mardose ti retourn dan son plas dan pale rwayal, tandis ki Haman ti depese pour retourn se li, tou kanmi, e latet kouver.

¹³ Ler Haman ti rakont son fanm Zeres ek tou son bann zanmi, sa ki ti'n ariv li, zot ti dir li, “Si Mardose, devan ki ou'n konmans abese i sorti dan pep Zwif, ou pa pou reisi fer nanryen kont li; ou pou sirman tonbe devan li.”

¹⁴ Zot ti ankor pe koze, ler bann enik lerwa ti arive. Zot ti depese pour anmenn Haman kot festen ki Ester ti'n prepare.