Ester 5 - Labib An Kreol Seselwa

Ester I Al kot Lerwa

¹ Son trwazyenm zour, Ester ti met bann lenz rwayal e antre dan lakour enteryer pale rwayal vizavi pale. Lerwa ti pe asiz lo son tronn rwayal dan pale vizavi lantre.

² Ler i ti war larenn Ester pe debout dan lakour, sa ti fer li gran plezir; i ti prezant Ester son baton annor ki ti dan son lanmen. Ester ti aprose e tous bout sa baton.

³ Lerwa ti demann li, “Ki i annan, larenn Ester? Ki reket ou annan pour fer? Mon pare pour mwan donn ou ziska lanmwatye mon rwayonm.”

⁴ Ester ti reponn, “Mazeste, si i fer ou plezir, ganny labonte vin ozordi kot mwan avek Haman, pour en festen ki mon pe prepare an loner lerwa.”

⁵ Alor, lerwa ti dir, “Apel Haman deswit pour ki nou akonpli dezir larenn Ester.” Apre, lerwa avek Haman ti al dan festen ki Ester ti'n prepare.

⁶ Pandan ki zot ti pe bwar diven, lerwa ti dir Ester, “Sa ki ou demande pour ganny akorde. Ki reket ou annan, ou ava gannyen menm ziska lanmwatye mon rwayonm.”

⁷ Ester ti reponn, “La sa ki mon demande, la mon reket:

⁸ Si lerwa i kontan pour fer mwan en faver e si lerwa i pare pour aksepte mon demann ek akonpli mon reket, mon ti ava kontan ki lerwa avek Haman zot retourn demen pour en festen ki mon pou prepare pour zot; demen, mon ava fer lerwa konn mon demann.”

Haman I Fer Dres en Lesafo pour Mardose

⁹ Sa zour, Haman ti sorti kontan avek leker zwaye. Me ler i ti war Mardose devan lantre pale e ki Mardose pa ti ni leve, ni montre respe devan li, i ti ranpli avek lakoler kont li.

¹⁰ Me Haman ti kontrol son lekor e i ti al se li. Apre, i ti anvoy sers son bann zanmi ek son fanm, Zeres.

¹¹ Haman ti rakont zot splander son larises, kantite garson ki i annan e bann loner ki lerwa in fer li avek son promosyon ki plas li par lao bann o zofisye ek bann minis dan lakour lerwa.

¹² I ti azoute, “Menm larenn Ester pa'n envit personn apard mwan, dan festen ki i'n prepare pour lerwa. I'n envit mwan demen ankor, avek lerwa.

¹³ Me tousala napa lenportans pour mwan, osi lontan ki mon war sa Zwif Mardose pe travay dan pale lerwa.”

¹⁴ Alor, Zeres, son fanm, ek tou son bann zanmi ti dir li, “Fer en lesafo 25 met oter e demen bomaten ou ava demann lerwa pour ki Mardose i ganny pann. Apre, ou ava kapab al ou festen avek lerwa dan lazwa.” Sa konsey ti fer plezir Haman, e i ti fer mont son lesafo.