Ester 3 - Labib An Kreol Seselwa

Haman I Deside Detri bann Zwif

¹ En pe letan apre sa bann levennman, lerwa Zerzes ti donn promosyon Haman, garson Hamedata, en Agagit: I ti donn li en pozisyon par lao tou bann o zofisye dan son ran.

² Tou bann serviter dan pale rwayal ti tonm azenou e prosternen devan Haman, parey lord ki lerwa ti'n donnen. Me Mardose pa ti ni tonm azenou ni prosternen.

³ Bann serviter lerwa ki ti devan laport pale rwayal ti demann Mardose, “Akoz ou dezobei lord lerwa?”

⁴ Zot ti poz li sa kestyon tou le zour, me i pa ti reponn zot. Alor, zot ti raport li avek Haman pour war si Mardose ki ti'n dir i en Zwif, pou persiste.

⁵ Ler Haman ti remarke ki Mardose pa ti tonm azenou ni prosternen devan li, i ti pran en gran lakoler.

⁶ Me i pa ti oze poz lanmen lo Mardose tousel, akoz zot ti'n osi dir li ki Mardose i en Zwif. Haman ti pe fer konplo pour detri tou bann Zwif, ki fer parti pep Mardose, dan rwayonm Zerzes antye.

Haman I Fer Konplo pour ekstermin bann Zwif

⁷ Dan premye mwan ki ti mwan Nizan, dan douzyenm lannen renny lerwa Zerzes, devan Haman, zot ti tir osor, ki zot ti apel Pourim, lo sak zour e sak mwan; sor ti tonm lo trezyenm zour, douzyenm mwan, ki mwan Adar.

⁸ Apre, Haman ti dir lerwa Zerzes, “I annan en serten pep apar, disperse parmi bann pep, dan tou bann provens ou rwayonm. Zot bann lalwa i diferan avek bann lalwa tou lezot pep, e zot pa obei bann lord lerwa. Napa okenn rezon pour lerwa toler sa bann zans.

⁹ Si lerwa i war bon, fer pibliy en dekre ki ordonn zot destriksyon, e mwan, mon ava pey 300 tonn larzan, dan lanmen bann zofisye ki ansarz ladministrasyon bann zafer lerwa, pour depoz dan trezor lerwa.”

¹⁰ Alor, lerwa ti pran son bag ki port son stanp e donn Haman, garson Hamedata, en Agagit, lennmi bann Zwif.

¹¹ Lerwa ti dir Haman, “Mon donn ou larzan, mon donn ou sa pep osi; fer sa ki ou oule avek zot.”

¹² Trezyenm zour premye mwan, bann sekreter lerwa ti ganny konvoke. Parey sa ki Haman ti'n ordonnen, en lord ti ganny ekri e anvoye kot tou bann reprezantan lerwa e bann gouverner dan tou bann provens e kot tou bann sef parmi lepep, kot sak nasyon dapre son lekritir ek son langaz. Sa lord ti'n ganny ekri e sinyen o non lerwa Zerzes e sele avek stanp lerwa.

¹³ Sa bann let ki ti ganny anvoye par bann mesaze dan tou bann provens, ti donn lord pour detri, touye e fer disparet tou Zwif, zenn koman vye, fanm ek zanfan, dan en sel zour: Trezyenm zour, dan douzyenm mwan, ki mwan Adar. Permisyon pour fer piyaz zot bann byen ti ganny donnen.

¹⁴ En kopi sa dokiman ti ganny pibliye koman en lalwa dan sak provens pour ki tou lepep i pare pour sa zour.

¹⁵ Bann mesaze ti al toudswit, lo lord lerwa. Dekre ti ganny pibliye dan Siz, lavil kapital. Lerwa avek Haman ti asize pour bwar, tandis ki lavil Siz ti dan boulvers.