Ester 2 - Labib An Kreol Seselwa

Ester I Vin Larenn

¹ Apre sa bann levennman, ler lakoler lerwa Zerzes ti'n tonbe, i ti mazin Vasti, sa ki i ti'n fer e desizyon ki i ti'n pran kont li.

² Son bann enik ti dir li, “Fer rod bann zoli zenn fiy vyerz pour ou.

³ Nonm bann enspekter dan tou bann provens ou rwayonm, pour zot rasanble bann zoli zenn fiy vyerz, pour met dan lakour rwayal ki dan kapital Siz, anba sirveyans Hegai, enik lerwa ki annan responsabilite tou son bann fanm; fourni zot avek tou zot bann prodwi labote.

⁴ Sa zenn fiy ki lerwa ava pli kontan, ava vin larenn dan plas Vasti.” Sa propozisyon ti fer plezir lerwa e i ti swiv.

⁵ Dan lavil kapital Siz, ti annan en Zwif ki ti apel Mardose, garson Yair, en desandan Simei, garson Kis, ki sorti dan tribi Benzamen.

⁶ I ti parmi sa bann ki ti ganny anvoye annegzil depi Zerizalenm, avek Yekonya, lerwa Zida, par Naboukodonozor lerwa Babilonn.

⁷ Mardose ti'n elve son kouzin Hadasa, ki apel osi Ester. Annefe, Ester ti napa ni papa ni manman. Sa zenn fiy ti zoli en kantite. Kan son papa ek son manman ti mor, Mardose ti adopte li koman son prop fiy.

⁸ Alor, kan lord ek desizyon lerwa ti'n ganny pibliye, en kantite zenn fiy ti'n ganny rasanble dan Siz, lavil kapital, anba lotorite Hegai. Ester osi ti ganny anmennen dan pale lerwa anba sirveyans Hegai ki ti ansarz bann fanm.

⁹ Sa fiy ti fer li plezir e i ti ganny son faver. Deswit, i ti fourni li tou bann prodwi labote neseser, ek son rasyon manze. I ti osi swazir pour li set servant dan pale lerwa e plas li avek son bann zenn servant dan meyer plas dan lakour rwayal.

¹⁰ Ester pa ti les konnen lekel son fanmir, ni kote i sorti, akoz Mardose ti'n defann li dir.

¹¹ Tou le zour, Mardose ti ale vini dan zanviron lakour rwayal, pour ganny nouvel Ester e konnen ki mannyer i pe ganny trete.

¹² Alafen 12 mwan, dapre regilasyon pour bann fanm, tour sakenn bann zenn fiy pour al kot lerwa Zerzes ti arive. Bann zenn fiy dan lakour rwayal ti devre swiv tretman labote pour bann fanm pandan enn an. Pandan sis mwan avek delwil lamir, e apre, sis mwan avek bann prodwi parfen ek lezot prodwi pour fanm.

¹³ Ler sa zenn fiy ti al kot lerwa, i ti ganny tou sa ki i ti demande dan lakour rwayal pour anmenn avek li dan pale rwayal.

¹⁴ I ti al kot lerwa aswar; lannmen bomaten i ti al dan en lot lakour rwayal, anba sirveyans Saasgaz, enik lerwa ki ti ansarz son bann menazer. I pa ti retourn kot lerwa ankor, sof si lerwa ti anvi war li e i ti apel li par son non.

¹⁵ Ler tour Ester, fiy Abihail, tonton Mardose, e ki Mardose ti'n adopte koman son prop fiy, ti arive pour li al kot lerwa, i pa ti demann nanryen, eksepte sa ki Hegai, enik lerwa, ki ti ansarz bann fanm, ti'n konsey li. Tou dimoun ki ti war Ester ti admir li.

¹⁶ Ester ti ganny anmennen kot lerwa Zerzes dan son pale rwayal, dan dizyenm mwan ki ti mwan Tebet, dan setyenm lannen son renny.

¹⁷ Lerwa ti kontan Ester plis ki tou lezot fanm, e parmi tou bann zenn fiy vyerz, i ti ganny faver lerwa. Alor, lerwa ti plas kouronn rwayal lo son latet e fer li larenn dan plas Vasti.

¹⁸ Lerwa ti donn en gran festen pour tou son bann fonksyonner ek son bann minis; i ti donn sa festen an loner Ester. I ti tir taks dan tou bann provens e i ti donn bann kado avek en zenerozite rwayal.

¹⁹ Kan tou bann zenn fiy ti ganny rasanble pour dezyenm fwa, Mardose ti'n ganny apwente dan en pozisyon, par lerwa.

²⁰ Ester pa ti ankor fer konnen ni son fanmir, ni son lorizin, parey Mardose ti'n ordonn li. Ester ti egzekit tou lord Mardose parey ler i ti anba son responsabilite.

Mardose I Dekouver Konplo Kont Lerwa

²¹ Dan sa bann zour, alor ki Mardose ti dan son fonksyon de enik lerwa ki ti gard lantre pale lerwa, Bigtan ek Teres, ti pran lakoler e fer en konplo pour asasin lerwa Zerzes.

²² Ler Mardose ti aprann sa, i ti fer konnen larenn Ester. Larenn Ester ti dir sa avek lerwa, lo non Mardose.

²³ En lanket ti prouve ki sa ti vre; sa de zonm ti ganny pann. Sa ti ganny ekri dan Liv Listwar, dan prezans lerwa.