Esdras 4 - Labib An Kreol Seselwa

Lopozisyon dan Konstriksyon Tanp

¹ Bann lennmi Zida ek Benzamen ti tande ki bann ansyen egzile ti pe konstri en tanp pour SENYER, Bondye Izrael.

² Zot ti apros Zorobabel ek bann sef lafanmir pour dir zot, “Nou ava konstri sa tanp ansanm avek zot. Annefe, nou ador menm Bondye parey zot. Nou ofer li bann sakrifis depi lepok Asaradon, lerwa Asiri ki ti deport nou isi.”

³ Me Zorobabel, Zozye ek leres bann sef lafanmir Izrael ti reponn zot, “Konstriksyon en tanp pour nou Bondye pa konsern zot. Zis nou tousel, ki pou konstri en tanp pour SENYER, Bondye Izrael, parey lerwa Siris, lerwa Lapers in ordonn nou.”

⁴ Alor, bann zabitan sa pei ti dekouraz pep Zida e fer zot per pour anpes zot konstri tanp.

⁵ Zot ti pey bann konseye pour anpes travay marse. Zot ti fer sa pandan lavi Siris, lerwa Lapers e kontinyen ziska renny Dariis, lerwa Lapers.

Lopozisyon dan Konstriksyon Zerizalenm

⁶ O konmansman renny lerwa Zerzes, zot ti ekri en let lakizasyon kont bann zabitan Zida ek Zerizalenm.

⁷ Pandan renny Artakzerzes, Bislanm, Mitredat, Tabeel ek tou leres son bann asosye, ti ekri Artakzerzes, lerwa Lapers. Sa let ti ganny ekri dan langaz Arameen e i ti ganny tradwir.

⁸ Rehoum, gouverner sa rezyon ek Simsai, sekreter, ti osi ekri lerwa Artakzerzes konsernan Zerizalenm:

⁹ Delapar Rehoum, Gouverner rezyon, Simsai, sekreter, ek leres son bann koleg, ki sorti Din, Afarsatak, Tarpel, Afaras, Erek, Souz ek Elanm,

¹⁰ ek lezot pep ki son gran ekselans, Osnapar, ti deporte e ki'n enstal zot dan bann lavil Samari, e dan leres bann provens lo lot kote larivyer Efrat.

¹¹ La kopi sa let ki zot ti anvoye: Lerwa Artakzerzes: Nou ou bann serviter, zabitan provens ki lo lot kote Larivyer; nou anvoy konpliman.

¹² Nou pe fer konnen lerwa, ki bann Zwif ki'n sorti kot ou, in ariv parmi nou, Zerizalenm. Zot pe rekonstri sa lavil rebel e move. Zot pe repar miray e pe rekonstri bann fondasyon.

¹³ Nou pe fer konnen lerwa ki, si sa lavil i ganny rekonstri e si son bann miray i ganny repare, zot pa pou pey okenn taks, ni drwa ladwann, ek drwa pasaz. Finalman, kof rwayal pou fer pert.

¹⁴ Annefe, nou dan servis pale rwayal, i pa paret byen ki nou les lerwa ganny dezonore. Alor, nou fer li nou devwar anvoy sa lenformasyon.

¹⁵ Konmsa, lerwa ava fer verifye dan bann arsiv ou bann zanset. Ou ava war dan sa bann arsiv ki sa lavil in touzour rebel: I pa'n zanmen arete fer bokou ditor bann lerwa ek bann gouverner provens; depi lontan sa lavil i abitye revolte.

¹⁶ Nou pe fer konnen lerwa, kisisa lavil i ganny rekonstri e si son miray i ganny repare, ou pou nepli posed okenn teritwar lo lot kote larivyer Efrat.

¹⁷ Lerwa ti anvoy sa larepons: Rehoum, gouverner, Simsai, sekreter, avek tou leres zot bann koleg zabitan Samari ek lezot landrwa dan provens ki lo lot kote larivyer, mon anvoy konpliman.

¹⁸ Sa let ki zot in anvoy mwan in ganny tradwir e lir atantivman devan mwan.

¹⁹ Mon'n donn en lord pour fer bann resers. Mon'n dekouver ki sa lavil depi lontan in revolte kont bann lerwa e ki i'n annan bokou revolt ek rebelyon laba.

²⁰ I'n annan bann gran lerwa dan Zerizalenm, ki ti renny lo provens antye, lo lot kote larivyer e ki zot ti resevwar taks, drwa ladwann ek drwa pasaz.

²¹ Alor, donn en lord pour fer arete sa travay, pour ki sa lavil pa ganny rekonstri, ziska ki en lord i sorti kot mwan.

²² Fer byen atansyon, ki zot sever dan sa zafer, pour ki sa problenm pa fer ditor lerwa.

²³ Osito, ki let lerwa Artakzerzes ti ganny lir devan Rehoum ek Simsai ek lezot bann koleg, zot ti depese pour al deswit kot bann Zwif Zerizalenm. Zot ti servi vyolans pour fer aret travay e obliz bann Zwif aret konstriksyon.

²⁴ Alor, travay rekonstriksyon tanp dan Zerizalenm ti arete. Sa ti dire ziska dezyenm lannen renny Dariis, lerwa Lapers.