Eklezyas 6 - Labib An Kreol Seselwa

¹ I annan en lot maler ki arive anba soley, e ki akable en et imen.

² En zonm ki Bondye in donn larises, posesyon ek loner, ki pa mank nanryen, i annan tou sa ki i dezire, me Bondye pa'n les li zouir; me en etranze ki'n profite. Sa i vanite e i mal.

³ Si en zonm i ganny bokou zanfan e i viv en kantite lannen, menm si i viv lontan, me i pa profit boner lavi e ni menm annan en latonm ler i mor, mon dir ki en pti baba ki mor an nesan i pli ere ki li.

⁴ Annefe, sa zanfan in vin anven e in al dan teneb; in disparet dan fernwanr; son non in ganny efase.

⁵ Anplis, i pa'n war soley e i pa'n konn nanryen. Pour li, i annan plis trankilite ki pour sa zonm.

⁶ Ki benefis i annan pour viv 2,000 an san profit boner lavi? Tou pa i al dan en menm landrwa?

⁷ Tou lapenn travay en et imen i zis pour son labous, me san satisfer son lapeti.

⁸ Ki en saz i annan anplis ki en sot? Ki lavantaz en pov ki konn konport li byen dan lavi i annan?

⁹ Plito war keksoz avek ou lizye, ki zis fer travay mazinasyon; sa ankor i vanite, konmsi ou pe tay deryer divan.

¹⁰ Sa ki egziste in deza ganny son non; nou konnen ki mannyer zonm i ete, i pa kapab diskit avek en lot ki pli for ki li.

¹¹ Kan nou koz bokou, nou dir bokou plis keksoz initil; ki i annan deplis pour zonm profite?

¹² Zonm i travers lavi lo later, parey en lonbraz. Lekel ki konnen kwa ki bon pour li dan son lavi kourt? Lekel ki pou rakont sa ki arive apre li lo later?