Eklezyas 4 - Labib An Kreol Seselwa

¹ Mon'n war tou bann eksplwatasyon imen ki egziste anba soley. Kriye bann ki ganny kraze e napa personn pour ed zot. Pouvwar i dan kote bann ki pe dominen e napa personn pour sekour zot

² Mon krwar bann ki'n mor i pli ere ki bann ki ankor vivan.

³ Bann ki pa ankor ne i pli ere akoz zot pa ankor war tou sa bann lenzistis anba soley.

⁴ Mon'n war osi ki bann dimoun ki zot aktivite i selman pour reisir e depas lezot. Sa ankor i anven e en lakours deryer divan.

⁵ En fou i krwaz lebra e les li mor lafen.

⁶ En pti ponnyen repo i pli bon ki de ponnyen travay ki zis i en lakours deryer divan.

⁷ Mon'n war osi lezot keksoz initil anba soley:

⁸ En zonm i tousel; i napa ni zanfan, ni frer, me i travay san pozman. Son lizye pa zanmen fatige war larises. Alor, pour ki i pe travay e pe priv son lekor? Sa i vanite e en move sityasyon pour viv ladan.

⁹ De zonm asosye ansanm i pli bon ki en zonm tou sel. Ansanm zot benefisye en bon saler pour zot travay.

¹⁰ Si enn i tonbe, lot ava lev li. Maler pour sa enn ki tousel; ler i tonbe napa personn pour lev li.

¹¹ Demenm, si de dimoun i dormi ansanm, zot kapab sof kanmarad; me sa ki tousel pou ganny fre.

¹² En zonm tousel i kapab ganny atake, me de dimoun i kapab reziste latak; pli en lakord avek trwa bren pa fasil kase.

¹³ Plito en zenn garson pov me saz, ki en vye lerwa fou ki nepli kapab ekout konsey.

¹⁴ Menm si sa zenn garson i sorti dan prizon pour vin lerwa; menm si i ti en mandyan dan sa menm rwayonm.

¹⁵ Mon'n konstate ki tou dimoun anba soley i kontan koste obor sa zenn ki pou pran plas en lerwa ki'n mor.

¹⁶ En gran lafoul ti swiv, me apre detrwa lannen, zot nepli satisfe. Sa osi i en vanite konmsi ou pe tay deryer divan.