Egzod 40 - Labib An Kreol Seselwa

Konsekrasyon Sanktyer

¹ SENYER ti ordonn Moiz:

² Premye zour, premye mwan, ou ava mont sanktyer Latant Rankont.

³ Ou ava met Kof Temwannyaz ladan e ou ava kouver li avek rido separasyon.

⁴ Ou ava anmenn latab e depoz bann lofrann dipen. Ou ava anmenn portlanp e aranz son bann lalanp.

⁵ Ou ava met lotel annor pour lansan devan Kof Temwannyaz e ou ava plas rido devan lantre sanktyer.

⁶ Ou ava met lotel pour sakrifis devan lantre sanktyer Latant Rankont.

⁷ Ou ava met basen ant Latant Rankont ek lotel e ranpli li avek delo.

⁸ Ou ava aranz lakour toultour e met rido avek laport lakour.

⁹ Ou ava pran delwil pour lonksyon e konsakre sanktyer avek tou sa ki ladan; ou ava konsakre sanktyer avek tou son bann istansil. Konmsa, i ava vin sakre.

¹⁰ Ou ava fer lonksyon lo lotel sakrifis avek tou bann istansil; ou ava konsakre lotel. Konmsa, lotel ava vin tre sakre.

¹¹ Ou ava fer lonksyon lo basen avek son sipor e i ava ganny konsakre.

¹² Ou ava prezant Aaron avek son bann garson devan lantre Latant Rankont e ou ava lav zot dan delo.

¹³ Ou ava met bann labiyman sakre lo Aaron e donn li lonksyon; ou ava konsakre li e i ava servi mwan koman en pret.

¹⁴ Ou ava prezant son bann garson e met zot, zot labiyman.

¹⁵ Ou ava donn zot lonksyon parey ou ti fer anver zot papa; zot ava servi mwan koman pret. Sa lonksyon avek delwil ava fer zot pret pour touzour atraver tou bann zenerasyon.

¹⁶ Moiz ti fer egzakteman tou sa ki SENYER ti'n ordonn li.

Moiz I Enstal Sanktyer

¹⁷ Sanktyer ti ganny monte premye zour, premye mwan, dezyenm lannen.

¹⁸ Moiz ti mont sanktyer; i ti prepar son bann baz, plas bann kad, met bann bar e lev bann kolonn.

¹⁹ I ti tal latant lo sanktyer e met kouvertir latant lo la, parey SENYER ti'n ordonn li.

²⁰ Moiz ti pran plak ros lalyans e met dan Kof Lalyans; i ti met bann bar lo Kof e plas kouvertir lo Kof Lalyans.

²¹ I ti anmenn Kof dan sanktyer; i ti plas rido separasyon e kouver Kof Temwannyaz parey SENYER ti'n ordonn li.

²² Moiz ti met latab dan Latant Rankont, lo kote Nor avek sanktyer, an deor rido separasyon.

²³ I ti depoz dipen devan SENYER, parey SENYER ti'n ordonn li.

²⁴ Moiz ti met portlanp dan Latant Rankont, anfas avek latab, lo kote Sid sanktyer;

²⁵ I ti aranz bann lalanp devan SENYER, parey SENYER ti'n ordonn li.

²⁶ I ti plas lotel annor dan Latant Rankont, devan rido separasyon.

²⁷ I ti bril lansan parfimen, parey SENYER ti'n ordonn li.

²⁸ Moiz ti met rido devan lantre sanktyer.

²⁹ I ti plas lotel sakrifis dan lantre sanktyer, Latant Rankont, e ofer sakrifis konplet ek lofrann vezetal, parey SENYER ti'n ordonn li.

³⁰ I ti plas basen ant Latant Rankont ek lotel e vers delo pour pirifikasyon rityel.

³¹ Moiz, Aaron ek son bann garson ti servi pour lav zot lanmen ek zot lipye.

³² Ler zot ti antre dan Latant Rankont e ler zot ti apros lotel, zot ti lav zot, parey SENYER ti'n ordonn li.

³³ I ti aranz lakour otour sanktyer ek lotel, e met rido devan laport lakour. Konmsa ki Moiz ti konplet bann travay.

Nyaz lo Latant devan Senyer

³⁴ Alor, en nyaz ti vin kouver Latant Rankont e laglwar SENYER ti ranpli sanktyer.

³⁵ Moiz pa ti kapab antre dan Latant Rankont, akoz nyaz ti reste lo la e laglwar SENYER ti ranpli sanktyer.

³⁶ Kan nyaz ti leve par lao sanktyer, bann Izraelit ti met zot anrout pour en nouvo letap zot vwayaz.

³⁷ Si nyaz pa ti leve, zot ti reste la, ziska lizour ti fer.

³⁸ Dan lazournen, nyaz SENYER ti reste lo sanktyer; dan lannwit, ti annan en dife dan nyaz ki tou Izrael ti kapab war tou dilon zot vwayaz.