Egzod 39 - Labib An Kreol Seselwa

Labiyman bann Pret

¹ Bann labiyman spesyal pour servis dan sanktyer ti ganny fer avek lalenn ble, rouz e rouz fonse. Bann labiyman sakre ti ganny fer pour Aaron, parey SENYER ti'n ordonn Moiz.

² Bann artizan ti fer lefod kouler lor, avek latwal linenn, melanze avek lalenn ble, rouz e rouz fonse.

³ Bann fey annor tre fen, ti ganny dekoupe e bann artizan ti trese avek lalenn ble, rouz e rouz fonse avek bann difil linenn.

⁴ Bann bretel ti ganny atase lo de kote.

⁵ Sentir ki atas avek lefod ti fer avek en sel pyes, dan en sel pyes e dan menm fason avek lor, lalenn ble, rouz e rouz fonse e latwal linenn fen, trese, parey SENYER ti'n ordonn Moiz.

⁶ Bann pyer onyks ti ganny prepare, fikse dan bann montan annor. Non bann zanfan Izrael ti ganny grave ladan parey en sele.

⁷ Zot ti ganny met lo bann bretel lefod koman en memoryal an faver bann zanfan Izrael, parey SENYER ti'n ordonn Moiz.

Pektoral

⁸ Bann artizan ti fer pektoral, en louvraz par bann artizan, parey lefod, avek menm materyo: Lor, difil linenn trese, lalenn kouler ble, rouz e rouz fonse.

⁹ Pektoral ti kare e double; i ti 25 santimet lo sak kote.

¹⁰ I ti ganny garni avek kat ranze pyer presye. Premye ranze: Ribi, topaz, emerod;

¹¹ dezyenm ranze: En pyer rouz fonse, en safir, en dyanman;

¹² Trwazyenm ranze: Opal, agat, ametis;

¹³ katriyenm ranze: Krizolit, korlalin, zasp.

¹⁴ Ti annan 12 pyer presye kot non bann zanfan tribi Izrael ti ganny grave lo sak pyer presye, parey en sele.

¹⁵ Lo pektoral, ti annan bann sennon annor pir, dan laform bann lakord trese.

¹⁶ Ti annan de montan annor avek de bag annor. Sa de bag ti ganny met dan de bout pektoral.

¹⁷ Sa de lakord annor ti ganny met dan sa de bag lo bann bout pektoral.

¹⁸ Sa de lot bout sa de lakord ki ganny met avek sa de montan ki ti par devan, lo bann zepolet lefod.

¹⁹ Ti annan ankor de bag annor ki ti ganny met lo de bout pektoral, lo bor anndan, kont lefod.

²⁰ De lot bag annor ti ganny fer e ti ganny met anba sa de zepolet devan lo lefod, pre kot zot zwenn, par lao sentir lefod.

²¹ Pektoral ti ganny fikse avek en kordon lalenn kouler ble, rouz, rouz fonse, par son bann bag, avek lefod. Konmsa, pektoral ti reste lo sentir lefod e i pa ti kapab bouze lo lefod, parey SENYER ti'n ordonn Moiz.

Lezot Labiyman Sakre

²² Besalel ti osi fer rob lefod, en travay par bann artizan, kouler ble.

²³ Sa rob ti ouver dan milye, parey louvertir en lenz an kwir trese; ti annan en lourle toultour, pour anpes sa rob desire.

²⁴ Dan lourle sa rob, ti annan bann grenad kouler ble, rouz, rouz fonse avek difil linenn trese.

²⁵ Bann pti laklos annor pir ti ganny mete ant bann grenad toultour, anba rob, ant bann grenad:

²⁶ En pti laklos, en grenad, en pti laklos, en grenad, anba rob, pour ki i ganny servi parey SENYER ti'n ordonn Moiz.

²⁷ Bann artizan ti fer bann ornman rob avek latwal linenn fen, pour Aaron ek son bann garson.

²⁸ Zot ti osi fer bann tirban an linenn fen, bann bonnen avek latwal linenn fen; bann kannset avek latwal linenn fen, trese;

²⁹ sentir brode an linenn fen, trese, kouler ble, rouz, rouz fonse. Sa ti en louvraz brodri, parey SENYER ti'n ordonn Moiz.

³⁰ Zot ti fer rozet pour kouronn sakre annor pir, e zot ti grav en lenskripsyon parey en sele: Konsakre pour SENYER.

³¹ Zot ti fikse sa kouronn avek en kordon ble par anler tirban, parey SENYER ti'n donn lord Moiz.

Finisyon Travay

³² Konmsa ki tou bann travay pour sanktyer, Latant Rankont ti ganny fer. Bann Izraelit ti fer tou egzakteman parey SENYER ti'n ordonn Moiz.

³³ Zot ti anmenn sanktyer kot Moiz: Latant avek tou son bann akseswar: Krose, kad, treng, kolonn ek sipor;

³⁴ kouvertir fer avek lapo bann bouk, penn an rouz; kouvertir fer avek kwir fen ek vwal ki servi koman en rido;

³⁵ Kof temwannyaz, son bann bar ek son kouvertir;

³⁶ latab, tou bann istansil avek dipen pour lofrann;

³⁷ portlanp annor pir, son bann lalanp, bann ranze lalanp, tou bann istansil avek delwil pour bann lalanp;

³⁸ lotel annor, delwil pour lonksyon ek lansan parfimen, avek rido pour lantre latant;

³⁹ lotel an bronz, son griyaz an bronz, son bann bar ek tou son bann istansil, son basen ek son sipor;

⁴⁰ bann rido pour lakour, bann kolonn, bann sipor, rido laport lakour, son bann kordaz, pike ek tou bann istansil pour servi dan sanktyer, pour Latant Rankont;

⁴¹ bann labiyman spesyal pour bann ki servi dan sanktyer, bann labiyman sakre pour pret Aaron, ek bann labiyman ki son bann garson i mete pour egzers zot servis.

⁴² Bann Izraelit ti fer tou sa travay egzakteman parey SENYER ti'n ordonn Moiz.

⁴³ Kan Moiz ti war ki zot ti'n fer tou sa travay parey SENYER ti ordonnen, i ti beni zot.