Egzod 37 - Labib An Kreol Seselwa

Kof Lalyans

¹ Besalel ti fer Kof lalyans avek dibwa akasya. I ti mezir 125 santimet longer, 75 santimet larzer e 65 santimet oter.

² I ti kouver li avek lor pir anndan deor e donn li en bordir annor toultour.

³ I ti fer fonn kat bag annor ki i ti fikse dan son kat kwen: De lo en kote e de lo lot kote.

⁴ I ti fer bann bar avek dibwa akasya rekouver avek lor.

⁵ I ti met bann bar dan bann bag lo bann kote Kof pour kapab transport Kof.

⁶ I ti fer kouvertir Kof Lalyans annor pir, 125 santimet longer e 75 santimet larzer.

⁷ I ti fer de seriben annor forze ki i ti plas lo sak kote kouvertir Kof Lalyans:

⁸ Enn lo en bout, lot lo lot bout. I ti fer bann seriben en sel pyes avek kouvertir Kof, plase lo son de bout.

⁹ Bann seriben ti fas a fas avek lezel anler pour protez kouvertir Kof Lalyans; bann seriben ti pe get dan direksyon kouvertir Kof Lalyans.

Latab pour Lofrann Dipen

¹⁰ I ti osi fer en latab avek dibwa akasya, en met longer, 50 santimet larzer e 75 santimet oter.

¹¹ I ti kouver li avek lor pir e i ti fer en bordir annor toultour.

¹² I ti fer en kad wit santimet larzer, ki ti osi annan en bordir annor.

¹³ I ti fer fonn kat bag annor ki i ti plas lo kat kwen ki al avek son kat lapat.

¹⁴ Bann bag ki tenir bann bar ki ti servi pour transport latab, ti pros avek son bor.

¹⁵ I ti fer bann bar avek dibwa akasya, plake annor. Sa ti servi pour transport latab.

¹⁶ I ti fer tou bann istansil ki ti pou al lo latab, annor pir: Pla, lakoup, bol, potao pour servi delo pour pirifikasyon.

Fabrikasyon Portlanp

¹⁷ I ti osi fer en portlanp annor pir. Lipye ek montan sa portlanp ti ganny travay avek marto. Bann lakoup, bouton ek bann fler ti form en sel pyes.

¹⁸ Sis brans ti sorti dan bann kote: Trwa lo en kote e trwa lo lot kote portlanp.

¹⁹ Lo sak brans, ti annan trwa lakoup an form fler zamann avek bann bouton ek bann fler; parey lo lot brans: Trwa lakoup an form fler zamann, avek bann bouton ek bann fler. Sa ti parey pour bann sis brans ki sorti depi portlanp.

²⁰ Lo portlanp li menm, ti annan kat lakoup an form fler zamann avek zot bouton ek zot fler.

²¹ Ti annan en bouton anba son de premye brans, en bouton lo son de brans swivan, en bouton anba de dernyen brans. Sa ti parey lo sa sis brans ki sorti depi kot portlanp.

²² Zot bann bouton ek zot bann brans ti en sel pyes; tou ti ganny plake avek lor pir.

²³ Besalel ti fer sa bann lalanp, set an tou zot bobes ek zot bann sandriye; tou avek lor pir.

²⁴ I ti pran 30 kilo lor pir pour fer sa portlanp avek son bann akseswar.

Lotel Lansan

²⁵ Besalel ti fer lotel lansan avek dibwa akasya. I ti kare: 50 santimet longer, 50 santimet larzer e en met oter. Son bann kwen ti form en sel pyes avek lotel.

²⁶ I ti kouver li avek lor pir: Lao, son bann klwazon ek son bann kwen toultour; i ti fer en bordir annor toultour.

²⁷ I ti fer de bag annor par anba sa bordir, lo tou le de kote, pour met bann bar ki servi pour transport sa latab.

²⁸ I ti fer bann bar avek dibwa akasya ki i ti kouver avek lor.

Delwil Konsekrasyon

²⁹ I ti fer delwil pour lonksyon sakre avek lansan aromatik pir. Sa ti louvraz en parfimer.