Egzod 36 - Labib An Kreol Seselwa

¹ Besalel, Oholiab e tou bann zonm ki SENYER ti'n donn lasazes ek disernman neseser pour zot kapab fer tou bann travay pour servis dan sanktyer, ti egzekit bann travay egzakteman parey SENYER ti'n ordonnen.

Pep Izrael I Anmenn Tro Bokou Don

² Moiz ti fer apel Besalel, Oholiab ek lezot artizan kalifye ki SENYER ti'n donn lentelizans, e ki leker ti dispoze pour fer sa bann travay lo en baz volonter.

³ Moiz ti remet avek zot tou bann kontribisyon ki bann Izraelit ti'n donnen pour konstriksyon sanktyer. Me tou le bomaten, dimoun ti kontinyen donn Moiz zot lofrann volonter.

⁴ Alor, bann artizan kalifye ki ti pe fer tou bann travay lo sanktyer ti kit zot travay.

⁵ Zot ti al dir Moiz, “Lepep pe anmenn plis ki fodre pour fer travay ki SENYER in ordonnen.”

⁶ Alor, Moiz ti donn lord pour fer sa proklanmasyon partou dan kan: Personn, zonm oubyen fanm, pa devre anmenn ankor kontribisyon pour sanktyer. Alor, lepep ti aret anmenn bann don pour sanktyer.

⁷ Bann lobze ki zot ti'n anmennen ti ase pour fini tou travay ki ti annan.

Konstriksyon Sanktyer

⁸ Tou bann zonm avek talan ti kon-stri sanktyer avek dis roulo latwal an linenn trese, kouler ble, rouz kler e rouz fonse, avek bann seriben brode artistikman lo la.

⁹ Sak rido ti mezir 14 met lo de met. Sa ti parey pour tou lezot rido.

¹⁰ Senk rido ti ganny atase ansanm; lezot senk rido osi.

¹¹ Zot ti fer bann rozet kouler ble obor premye rido, dan bout premye lasanblaz; zot ti osi met bann rozet lo premye rido dan dezyenm lasanblaz.

¹² Zot ti fer 50 rozet lo premye rido; 50 rozet lo bor latwal dan bout dezyenm lasanblaz; tou sa bann rozet ti parey kanmarad.

¹³ Zot ti fer 50 zagraf annor ki ti atas avek bann rido, enn apre lot. Konmsa, sanktyer ti fer en sel pyes.

¹⁴ Zot ti fer bann rido avek pwal kabri, ki ti vin koman en latant par lao sanktyer. An tou, ti annan 11 rido.

¹⁵ Sak rido ti menm dimansyon: 15 met lo 2 met.

¹⁶ Zot ti atas senk rido ansanm, e lezot sis ansanm, separeman.

¹⁷ Zot ti fer 50 rozet obor premye rido dan bout premye lasanblaz, e 50 rozet obor latwal dezyenm lasanblaz.

¹⁸ Zot ti fer 50 zagraf an bronz pour fer lasanblaz latant, pour li fer en tou.

¹⁹ Zot ti fer pour latant, en kouvertir fer avek lapo bann bouk, tenn an rouz, e en lot kouvertir fer avek kwir fen par lao.

²⁰ Zot ti fer bann kad avek dibwa akasya, ki zot ti met debout.

²¹ Sak kad ti mezir 5 met lo 75 santimet.

²² Sak kad ti annan de pike paralel, pour atas zot ansanm. Sa ti parey pour tou bann kad dan sanktyer.

²³ Zot ti fer 20 kad pour sanktyer lo kote Sid, dan direksyon Sid.

²⁴ Zot ti fer 40 bar annarzan ki zot ti plas anba sa 20 kad, de pour sak kad e pour son de pike.

²⁵ Zot ti fer 20 kad pour dezyenm kote sanktyer, tournen dan direksyon Nor,

²⁶ avek zot 40 bar annarzan, de bar anba sak kad.

²⁷ Zot ti fer sis kad pour met dan fon sanktyer, kote Was.

²⁸ Zot ti fer de kad pour bann kwen dan fon, dan sanktyer;

²⁹ zot ti separe anba, me atase anler depi premye bag; zot ti fer parey pour tou le de ki ti'n ganny plase dan de kwen.

³⁰ An tou, ti annan wit kad avek zot bar annarzan; sa ti fer 16 bar, de pour sak kad.

³¹ Zot ti fer senk treng avek dibwa akasya pour bann kad lo en kote sanktyer;

³² senk bag pour bann kad ki lo lot kote sanktyer e senk bar pour bann kad ki lo kote sanktyer ki fer son fon, lo kote Was.

³³ Bar santral ti pas atraver bann kad, dan milye, lo tou zot longer.

³⁴ Zot ti kouver bann kad avek lor, bann bag annor ki pou tenir bann bar ki ava osi ganny kouver avek lor.

³⁵ Zot ti fer rido kouler ble, rouz kler e rouz fonse, e trese avek difil latwal linenn trese, avek bann seriben brode ladan avek bokou swen.

³⁶ Zot ti fer kat kolonn avek dibwa akasya, kouver avek lor, ansanm avek zot krose annor, poze lo kat bar annarzan.

³⁷ Zot ti fer en rido kouler ble, rouz kler e rouz fonse, avek latwal linenn fen, trese pour lantre latant. Sa travay ti ganny fer par bann brodez.

³⁸ Zot ti fer son senk kolonn avek zot bann krose, e kouver latet bann kolonn ek bann treng avek lor; son bann senk bar ti an bronz.