Egzod 30 - Labib An Kreol Seselwa

Lotel Lansan

¹ Ou ava fer en lotel avek dibwa akasya pour bril lansan.

² I ava kare: 50 santimet longer, 50 santimet larzer e 90 santimet oter. Son bann korn ava fer en sel pyes ansanm avek li.

³ Ou ava kouver li avek lor pir e ou ava fer en bordir annor toultour.

⁴ Ou ava met anba sa bordir lo sak kote lotel, de bag annor pour resevwar bann bar pour transport li.

⁵ Ou ava fer bann bar avek dibwa akasya e ou ava kouver zot avek lor.

⁶ Ou ava plas sa lotel devan rido ki maske Kof Lalyans, anfas avek kouvertir sakre ki lo Kof, la kot mon pou rankontre ou.

⁷ Tou le bomaten, kan i ava al okip bann lalanp, Aaron ava bril lansan aromatik. I ava bril li tou le bomaten, letan i pe aranz bann lalanp.

⁸ I ava osi bril lansan aswar, ler i alim bann lalanp. Lansan ava brile devan SENYER toultan, zenerasyon apre zenerasyon.

⁹ Zot pa pou ofer okenn lansan ordiner lo sa lotel, ni sakrifis konplet, ni lofrann vezetal, ni vers en lofrann labwason.

¹⁰ En fwa par an, Aaron ava fer rityel pirifikasyon lo bann kwen lotel. I ava ofer disan sakrifis pour pardon pese zenerasyon apre zenerasyon. Sa lotel ava ganny konsidere koman tre sakre pour SENYER.

Taks pour Sanktyer

¹¹ SENYER ti dir ordonn Moiz:

¹² Kan ou fer resansman pep Izrael, sakenn zot ava pey SENYER en taks pour son lavi. Konmsa, pou napa okenn maler parmi zot, pandan resansman.

¹³ Tou dimoun ki ganny konte dan sa resansman ava donn SENYER en pyes senk granm larzan, savedir, lanmwatye linite pwa ki ganny servi dan sanktyer.

¹⁴ Tou dimoun ki ganny konte depi laz 20 an, an montan, ava pey sa taks pour SENYER.

¹⁵ Sa enn ki ris pa pou pey plis ki sa enn ki pov. Sa enn ki pov pa devre donn mwens pour SENYER, ki senk granm larzan koman taks pour son lavi.

¹⁶ Ou ava pran sa larzan taks avek pep Izrael, e ou ava itiliz li pour servis Latant Rankont. Pour bann Izraelit, i ava en memoryal devan SENYER koman en taks pour zot lavi.

Basen an Bronz

¹⁷ SENYER ti ordonn Moiz:

¹⁸ Ou ava fer en basen an bronz, ki ava servi pour bann ben rityel. Ou ava plas li ant Latant Rankont ek lotel e ou ava ranpli li avek delo.

¹⁹ Aaron ek son bann garson ava servi sa delo pour lav zot lanmen ek zot lipye.

²⁰ Kan zot antre dan Latant Rankont, zot ava lav zot avek delo, pour ki zot pa mor. Zot ava osi lav zot lanmen ek zot lipye kan zot apros lotel pour ofer sakrifis e bril bann lofrann pour SENYER. Konmsa, zot pa ava mor.

²¹ Zot ava lav zot lanmen ek zot lipye pangar zot mor. Sa i ava en regleman pour touzour, pour li ek son desandans, zenerasyon apre zenerasyon.

Delwil Konsekrasyon

²² SENYER ti ordonn Moiz:

²³ Pran bann meyer prodwi aromatik: Senk kilo lamir likid; de kilo edmi lesans kannel; de kilo edmi feyaz parfimen;

²⁴ senk kilo kasi, dapre pwa ki servi dan sanktyer ek sis lit delwil doliv.

²⁵ Avek sa bann parfen, ou ava fer delwil pour konsekrasyon. I ava en melanz spesyal, travay en parfimer, ki ava ganny servi pour bann seremoni konsekrasyon.

²⁶ Ou ava servi sa delwil pour konsakre Latant Rankont, Kof lalyans,

²⁷ latab avek tou son bann akseswar, portlanp avek son bann akseswar, basen avek son sipor, lotel lansan,

²⁸ lotel sakrifis avek tou son bann akseswar, basen avek son sipor.

²⁹ Ou ava konsakre tou sa bann lobze; zot ava vin tre sakre. Tou sa ki tous avek sa bann lobze pou vin sakre.

³⁰ Ou ava fer lonksyon lo Aaron ek son bann garson; ou ava konsakre zot pour servi mwan koman pret.

³¹ Ou ava dir pep Izrael: Sa i delwil lonksyon pour mwan, ki pou ganny servi zenerasyon apre zenerasyon.

³² I pa pou ganny servi lo okenn dimoun ordiner. Zot pa devre servi sa reset pour fer okenn lezot delwil. I sakre e i devre reste sakre pour zot.

³³ En dimoun ki imit sa reset e ki vers li lo en dimoun ordiner, pou ganny sase dan kominote.

Lansan

³⁴ SENYER ti ordonn Moiz: Pran kantite egal bann sibstans aromatik: Larezin, onyks ek galbanoum. Melanz zot avek en menm kantite lansan meyer kalite.

³⁵ En parfimer ava melanz tousala avek disel, pour fer en prodwi pir ki ava rezerve zis pour mwan.

³⁶ Ou ava kraz li e fer li vin anpoud e met li devan Kof Lalyans, dan Latant Rankont, la kot mon pour rankontre ou. Sa i devre en keksoz tre sakre pour zot.

³⁷ Ou pa pou fabrik en parfen pour zot servi dan en fason ordiner. I ava reste konsakre pour SENYER.

³⁸ En dimoun ki esey fer en parfen parey, pour li santi son loder, pou ganny sase dan kominote.