Egzod 27 - Labib An Kreol Seselwa

Lotel Sakrifis

¹ Ou ava fer en lotel avek dibwa akasya; i ava mezir de met edmi lo sak kote e en met edmi oter.

² Ou ava fer bann korn lo sak kwen ki form en sel avek lotel. Lotel ava ganny rekouver an bronz.

³ Ou ava fer bann resipyan pour ranmas lasann lagres brile, son bann lapel, son bann bol, son bann fourset ek son bann lansanswar. Ou ava fer tou sa bann akseswar lotel an bronz.

⁴ Ou ava osi fer en griyaz an bronz, dan laform en lasenn, avek en bag an bronz lo son kat kwen.

⁵ Ou ava met sa griyaz anba rebor lotel; i ava pran depi anba ziska lanmwatye oter lotel.

⁶ Ou ava fer bann bar avek dibwa akasya pour lotel e ou ava rekouver zot avek bronz.

⁷ Zot ava pas sa bann bar dan bann bag ki lo sak kote lotel ler pour li ganny transporte.

⁸ Ou ava fer sa lotel kre anndan e an plans; ou ava fer li dapre model ki mon ti montre ou lo montanny.

Lakour Latant Rankont

⁹ Ou ava fer en lakour pour latant sakre. Ou ava fer bann lez latwal an linenn fen, trese, 50 met longer, lo kote Sid.

¹⁰ I ava tenir lo son 20 kolonn e son 20 sipor an bronz. I ava annan bann krose pour bann kolonn ek bann treng annarzan.

¹¹ Pour kote Nor, i ava osi annan bann lez latwal ki mezir 50 met longer avek zot 20 kolonn ek zot 20 sipor an bronz. Bann krose pour bann kolonn ek zot bann treng ava annarzan.

¹² Pour kote Was, lo larzer lakour, i ava annan lez latwal 25 met larzer, fikse avek 10 kolonn lo 10 sipor.

¹³ Larzer lakour lo kote Les, ava osi 25 met.

¹⁴ I ava annan bann lez latwal set met edmi lo en kote, avek trwa kolonn ek trwa sipor.

¹⁵ Pour lot kote lantre, i ava annan en lez latwal set met edmi longer, avek zot trwa kolonn ek trwa sipor.

¹⁶ Pour laport lakour, i ava annan en rido dis met longer, kouler rouz vyolet, rouz kler e rouz fonse, fer avek latwal linenn trese.

¹⁷ Tou bann kolonn ki toultour lakour, ava annan bann treng ek bann krose annarzan; zot sipor ava an bronz.

¹⁸ Lakour ava 50 met longer lo 25 met larzer, e de met edmi oter. Tou bann rido ava ganny fer avek latwal linenn tre fen e trese; zot sipor ava an bronz.

¹⁹ Tou bann istansil pour servis latant sakre, tou bann pike pour latant e tou bann pike pour lakour ava an bronz.

Swen pour Lalanp Sanktyer

²⁰ Ou ava donn lord bann Izraelit pour fourni ou delwil doliv pir e vyerz, pour gard bann lalanp touzour alimen.

²¹ Aaron avek son bann garson ava plas sa portlanp devan sa rido ki maske Kof lalyans, pour ki i alimen devan SENYER depi bomaten ziska aswar. Sa regleman ava pour touzour, pour tou zenerasyon bann Izraelit.