Egzod 26 - Labib An Kreol Seselwa

Latant Rankont

¹ Ou ava fer latant sakre avek dis lez latwal fer avek linenn fen, kouler ble, rouz kler e rouz fonse, avek bann seriben brode ladan par bann artizan kalifye.

² Sak lez latwal ava mezir 14 met longer, lo de met larzer.

³ Ou ava atas senk lez latwal ansanm; lot senk lez ava osi ganny atase ansanm, me separeman.

⁴ Ou ava fer bann lase kouler ble, lo bor premye lez latwal ki lo lot bout premye lasanblaz, e ou ava osi met bann lase lo bor lez latwal ki lo bout dezyenm lasanblaz.

⁵ Ou ava fer 50 lase lo premye lez latwal e 50 lase lo bor lez latwal ki lo bout dezyenm lasanblaz; tou sa bann lase pour koresponn avek kanmarad.

⁶ Ou ava fer 50 zagraf annor ki ou ava servi pour atas bann lez latwal ansanm. Konmsa, latant sakre ava form en sel pyes.

⁷ Ou ava osi fer bann lez latwal avek pwal kabri, pour form en kouvertir par lao latant sakre. Ou ava fer 11 lez latwal an tou.

⁸ Sak lez latwal ava mezir 15 met longer, lo de met larzer.

⁹ Ou ava atas senk lez ansanm e separeman, ou ava atas lezot sis ansanm; sizyenm lez ava ganny pliye an de lo devan latant sakre.

¹⁰ Ou ava fer 50 lase obor premye lez, ki lo bout premye lasanblaz, e 50 lase obor lez ki lo bout dezyenm lasanblaz.

¹¹ Ou ava fer 50 zagraf an bronz e agraf zot tou ansanm.

¹² Bann lez latwal pour latant sakre ava annan en debordman en demi longer ki ava retonm lo deryer latant sakre.

¹³ Sa morso 30 santimet sirplis lo longer bann lez latwal, ava retonm lo kote, e kouver latant sakre.

¹⁴ Ou ava fer pour latant sakre, en kouvertir avek lapo mouton ki'n tenn an rouz, avek en lot kouvertir an kwir fen par lao.

¹⁵ Ou ava fer bann kad avek dibwa akasya, ki ou ava plas debout dan latant sakre.

¹⁶ Sak kad ava mezir senk met longer, lo 75 santimet larzer.

¹⁷ Sak kad ava annan de pike pour tenir zot ansanm. Ou ava fer parey pour tou bann kad dan latant sakre.

¹⁸ Ou ava fer 20 kad pour kote Sid latant sakre.

¹⁹ Ou ava fer 40 sipor annarzan ki ou ava met anba sa 20 kad, de pour sak kad anba son de pike.

²⁰ Ou ava fer 20 kad pour dezyenm kote latant sakre ki vir dan direksyon Nor,

²¹ avek zot kat sipor annarzan, de sipor anba sak kad.

²² Ou ava fer sis kad pour met dan latant sakre ver Was.

²³ Ou ava fer de kad pour bann kwen deryer latant sakre;

²⁴ zot ava separe anba, me atase anler dan premye bag; ou ava fer tou le de parey; zot ava form son de kwen.

²⁵ An tou, i ava annan wit kad avek zot sipor annarzan; savedir 16 sipor, de pour sak kad.

²⁶ Ou ava fer senk bar avek dibwa akasya pour bann kad lo en kote latant sakre,

²⁷ senk bar pour bann kad ki lo lot kote latant sakre e senk bar pour bann kad ki lo latant sakre, kote Was.

²⁸ Bar santral, dan milye bann kad, ava travers latant sakre en bout ziska lot.

²⁹ Ou ava kouver bann kad avek lor; bann bag ki pou tenir bann bar, ava osi ganny kouver avek lor.

³⁰ Ou ava konstri latant sakre dapre model ki mon ti montre ou lo montanny.

³¹ Ou ava fer en rido kouler ble, rouz vyolet, rouz kler e rouz fonse, e trese avek difil latwal linenn fen, brode avek bokou swen avek bann seriben ladan.

³² Ou ava met li anpandan lo kat kolonn fer avek dibwa akasya, kouver avek lor; zot ava ganny tenir avek zot zagraf annor, poze lo kat sipor annarzan.

³³ Ou ava atas sa rido avek bann zagraf; anndan, deryer sa rido ou ava plas Kof temwannyaz. Sa rido ava en separasyon ant Lasal Sen ek Lasal Tre Sen.

³⁴ Ou ava plas plak kouvertir lo Kof Temwannyaz dan Lasal Tre Sen.

³⁵ Ou ava plas latab an deor rido e portlanp anfas avek latab, lo kote Sid latant sakre; latab ava lo kote Nor.

³⁶ Ou ava fer pour lantre latant sakre en rido fer avek latwal linenn fen, melanze avek lalenn kouler ble, rouz kler e rouz fonse, ki ava en travay brodri.

³⁷ Pour bann rido, ou ava fer senk kolonn avek dibwa akasya ki ou ava kouver avek lor; ou ava met bann zagraf annor; pour sa, ou ava fer fonn senk sipor an bronz.